ORANJESTAD (AAN): Club Boneriano ultimamente a organisa diferente actividad exitoso pa recauda fondo pa drecha nan club historico na San Nicolas.
Entre otro tabatin bendemento di cuminda, cu cua fondo, conbina cu Aruba Doet, a haci gran parti di limpiesa rond di e edificio. Tambe tabatin e ‘Gospel Concert’ for di cua fondo a paga e debe grandi cu a hereda di e comision anterior.
Club Boneriano tabata centro di hopi actividad cultural cu a uni pueblo durante hopi generacion. Actualmente e edificio ta den mal estado y e deseo ta pa duna e edificio un renobacion pa asina e bolbe sirbi como un centro activo pa e bario di San Nicolas. Pa logra esey, e club ta conta cu e sosten di pueblo door di participa na e diferente actividadnan cu e club ta organisa.
Señor Gregory Goedgedrag di Club Boneriano, ta invita pueblo di Aruba en general na e siguiente grandioso actividad ‘Bon Ku Ne’, diadomingo dia 27 di juli, 2025, na Centro di Bario Dakota. Registro ta habri for di 2:00 pm, y e wega lo cuminsa di 4:00 pm pa 7:00 pm. Lo tin premionan hopi atractivo y un tremendo ambiente.
Tur fondo recauda durante e evento lo wordu uza pa sigui cu e limpiesa y trabounan di renobacion di e Heritage Center Club Boneriano. Tambe cu e fondo recauda lo inverti den e siguiente actividad pa celebra Dia di Boneiro dia 14 di september proximo for di 10or di mainta.
Ya tin 4 grupo musical di Boneiro registra pa bin Aruba di cua 2 ta sigur. For di diahuebs 11 di september ya caba nan ta na Aruba pa trece ambiente na Centro di Bario Dakota den e fin di siman. Pa 5or di atardi, lo subi caya di Dakota cu Simadan. Bandanan di Aruba tambe ta wordo encurasha pa join e actividad aki.
Club Boneriano ta haci un yamada na tur miembro, simpatisante, y esnan cu tin e club den nan curason, pa yega, duna apoyo y contribui cu un sentimiento di union y orguyo.
