Abogado mr. Desiree Croes:
*E ta wordo mira como sospechoso sin sa pakico
ORANJESTAD (AAN)—E caso di e politico, señor Mike de Meza, ta pega na OM, na e momentonan aki, segun su abogado mr. Desiree Croes a declara, den entrevista cu Matutino DIARIO.
“T’asina cu for di Februari caba esaki a cuminza, unda cu a haci e prome screening, y a sali un punto eynan cu mester a regla pa locual ta su asuntonan di belasting, y hasta director di DIMP a admiti e momento ey, cu tur cos a wordo regla”, mr. Croes a señala.
Pero como gran sorpresa, na mei a presenta un denuncia contra señor de Meza, na OM, pa un fayo cu nan ta considera un delito fiscal. Abogado mr. Croes ta haya esaki hopi straño pasobra, normalmente, a pasa mas biaha cu un hende por haci un fout, a keda sin entrega nan aangifting na tempo, y normalmente nan ta referi esaki na e parti administrativo.
“Pero specificamente den e caso aki, director di DIMP a scoge e caminda penal, unda cu pa nos esey ta algo straño y dos ta cu na momento cu bo a haci esaki, mi ta sigur, conociendo e persona aki, e lo a duna un pakete completo na OM. Mester corda cu na OM, bo no tin specialismo di Impuesto pa por compronde kico a pasa akinan. Mi a compronde cu el a keda mucho largo ora el a haci denuncia, a ser papia di cinco, seis ora, unda mi ta kere el a splica den placa chikito kico e ta sospecha cu señor de Meza no a cumpli cu su debernan cu impuesto”, mr. Desiree Croes a relata.
El a agrega cu OM solamente a entrega un articulo den ley den cual hopi cos por interpreta, y p’esey e ta pidi mas claridad cual constantemente ta wordo nenga. “Aworaki nos ta bay apela e ultimo momento cu nan a nenga nos pa duna nos claridad, y dialuna e lo sali y djey nos ta wak unda nos ta bay. Nos ta bay na e instancia mas halto, pasobra pa nos ta inaceptabel cu bo ta wordo yama un sospechoso y e no sa di con. Nos no por laga esaki pasa pasobra, asina nos tin un problema hopi grandi cu nos pais”, mr. Desiree Croes a subraya.
