Anochi festivo recaudando fondo pa yuda renoba Cas di Cultura

Actividad a uni Aruba cu Hulanda

ORANJESTAD (AAN): Den presencia di un gran cantidad di hende, dia 8 di November a tuma lugar e anochi benefico pa presenta e plannan di e renovacion di e teatro nacional di Aruba, Cas di Cultura. E evento aki, organiza pa Cas di Cultura y Representacion di Hulanda na Aruba (VNO), a reuni figura prominente for di e sector cultural, publico y privado di Aruba pa un anochi di musica y inspiracion.

E evento a worde oficialmente habri pa Prome Minister di Aruba, Mike Eman, kende a enfatisa e importancia di Cas di Cultura pa Aruba y pa cultura como e fundamento pa educacion, identidad y union den comunidad. Eman, na nomber di Gobierno di Aruba, a anuncia un compromiso adicional di 5 miyon Florin pa e renovacion.

   E anochi a worde dirigi pa Vicky Arens, director di Cas di Cultura, y Vincent Storimans, Director di  Representacion di Hulanda na Aruba. Nan a subraya e importancia di colaboracion cultural den Reino y e meta comun pa conserva y fortalece e herencia cultural di Aruba.

   “E experiencia positivo cu un mucha ta haya na Cas di Cultura ta fortifica e lazo cu nos isla, y esaki ta algo cu nos ta desea pa tur hende. Nos no ta haya solamente un edificio renoba, sino un compleho diseña cu un bista sostenibel pa e futuro” segun Vicky Arens.

   “Cas di Cultura ta mas cu un teatro – ta un punto di encuentro caminda generacionnan di Arubiano ta reuni pa comparti arte, musica y experiencia,” segun Vincent Storimans, Director di e Representacion di Hulanda na Aruba (VNO). “Cu e anochi benefico aki, nos ta celebra no solamente e rikesa cultural di Aruba, sino tambe nos cooperacion pa e futuro cultural di nos pais.”

   Durante e anochi, tambe a tuma palabra Ronella Croes, CEO di Aruba Tourism Authority (ATA), y Roland Croes, director di Setar NV, kende a enfatisa e papel esencial cu cultura tin den sociedad. Den e contexto aki, ATA a anuncia un donacion di 1 miyon Florin pa e renovacion di Cas di Cultura.

   E evento benefico a tuma lugar den e elegante ballroom di Hilton Aruba Caribbean Resort & Casino, caminda e invitadonan a disfruta di un anochi di cocktail cu un ambiente agradable. E parte musical a worde brinda pa e internacionalmente renombra Reveron Trio, acompaña pa e artista invita Qiao Chen Solomon (violin) y Joel Pagan (altviolin).

   Si bo ta desea di contribui tambe na e renobacion di Cas di Cultura, por bishita e website aki:

www.bit.ly/cdcrenoba

   Durante e anochi tabatin hopi atencion pa e renovacion di Cas di Cultura y e esfuerso pa recauda fondo pa esaki. Den e proyecto di renovacion di Cas di Cultura, e Gobierno di Aruba, empresanan local y donantenan particular ta haci nan aporte. Te awor, rond di 63% di e 17 miyon Florin necesario  a worde priminti.