Pa promove alimentacion saludabel y pagabel
ORANJESTAD (AAN): Durante un conferencia di prensa, den ocacion di Dia Mundial di Diabetes, Departamento di Salud Publico (DVG) ta lansa un campaña nobo titula “Come Bon, Paga Menos”, un iniciativa nacional pa stimula escohencianan di alimentacion cu ta mas saludabel y accesibel pa tur hende.
Un situashon preocupante: Segun dato mas reciente di DVG, 46% di adulto na Aruba ta obeso, y si nos conta e personanan cu ta sobrepeso, casi 8 di 10 Arubiano ta den e categoria di sobrepeso of obesidad. E panorama entre mucha ta mes alarmante ainda: 42.7% di mucha entre 5 y 12 aña ta sobrepeso of obeso.
E cifranan aki ta refleha realidad cu hopi famia ta enfrenta cada dia.
Obesidad ta aumenta riesgo pa malesa manera diabetes, malesa di curason, presion halto, y cierto tipo di cancer. E situacion aki no solamente ta afecta salud di individuonan, sino tambe ta eherce un presion financiero grandi riba e sistema di cuido di salud na Aruba, unda mas cu mita di tur gasto ta relaciona cu malesanan cronico.
Meta di e campaña: E campaña “Come Bon, Paga Menos” tin como meta pa mustra cu come saludabel no mester costa hopi, y pa empodera famianan Arubiano cu consehonan practico y alternativa sostenibel pa bienestar di nos comunidad.
Durante e siguiente 12 luna, e campaña lo pone enfasis riba e peligro di bebida cu hopi sucu, cuminda ultra-procesa, y lo presenta alternativanan mas nutritivo, sabroso y economico.
Tema inicial: “Cambia bo Slok”: E prome tema di e campaña lo ta “Cambia bo Slok”. Den periodo di november te januari, DVG lo enfoca riba consumo di bebida cu ta contene hopi sucu.
E mensahe lo ta: pensa dos biaha prome bo bebe. Den e fase aki, e campaña lo duna informacion riba e relacion entre bebida cu hopi sucu y diabetes, mientras ta mustra opcionnan mas saludable y pagabel pa tur famia.
Departamento di Salud Publico ta haci un yamada na tur sector gobierno, empresa, scol y comunidad pa uni forsa den e esfuerso pa crea un ambiente cu ta fasilita escohencia saludable.
“Pa logra un cambio real, nos mester traha hunto. Salud no mester ta un luho, pero e mester ta un posibilidad pa tur Arubiano,” DVG ta invita tur hende pa participa den e campaña, sigui e consehonan practico y haci cambionan chikito den nan bida dia pa dia.
“Laga nos haci e cambio slok pa slok, cambia nos habitonan, pa cuida nos salud.”
{gallery}Come Bon, Paga Menos{/gallery}
