Anochi di formacion profesional na Colegio Arubano tabata un exito grandi

ORANJESTAD (AAN): Siman pasa Colegio Arubano a organiza e Anochi di Formacion Profesional pa su alumnonan di bovenbouw.

Durante e anochi aki e participacion tabata hopi halto. E evento inspirado aki, unda mayornan tambe tabata bonbini, a bira posibel danki na colaboracion estrecho di e decanonan di Colegio Arubano, e fundacion WeConnect, Interact CA, Key Club di CA y demas boluntario.

   E anochi di Formacion Profesional a ofrece e studiantenan un cantidad di informacion y inspiracion, unda un cantidad di orador y organizacionnan boluntariamente a duna informacion na e futuro generacion. Obhetivo di e anochi aki tabata pa yuda e alumnonan di Colegio Arubano explora diverso opcionnan profesional y obtene e pasonan pa haci bira realidad nan soño y meta. Durante e anochi a ofrece diferente informacion tocante e diversidad di trayectorianan cu tin y a duna e alumnonan e oportunidad di siña directamente di e profesionalnan cu diferente specialidad.

   Segun señora Richeilla Wijgaarde, decano di Colegio Arubano: "E organizacion di un anochi di formacion profesional ta un expresion di nos compromiso permanente pa e crecemento y desaroyo educativo di nos studiantenan na Colegio Arubano. E anochi di formacion profesional a nace despues di constata cu hopi di nos alumnonan ta enfrenta decisionnan importante relaciona cu nan estudio avansa y eleccion di nan carera profesional. E ta un etapa critico den nan bida, unda nan mester orienta riba e variedad di opcionnan cu mundo tin pa ofrece. Nos kier proporciona na nos alumnonan e hermentnan y informacion necesario pa nan tuma e decision fundamental tocante nan futuro.”

  Colegio Arubano ta expresa su sincero agradecimento na e cantidad di partnernan, oradornan y coleganan cu a contribui na un anochi di exito sin presedente, e reciente anochi di formacion profesional. Nos ta specialmente orguyoso cu mayoria di nos oradornan ta ex alumnonan di Colegio Arubano y ta gradici nan sinceramente pa nan disposicion di bolbe y comparti nan experencianan profesional y vital cu nos alumnonan actual. Colegio Arubano y tur partner cu a participa a keda encanta cu e exito grandi di e Anochi di Formacion Profesional y ta spera di por continua cu e iniciativa aki den futuro.