Aña escolar nobo aki lo yuda casi 800 mucha tur mainta cu desayuno

Fundacion a indica cu e cifra a kibra record - ORANJESTAD (AAN): Manera cu DIARIO a trece dilanti caba,

Diahuebs atardi durante e apertura di e sucursal nobo di Pizza Hut den Bernhardstraat na San Nicolas, gerencia a presenta un check di 10.000 Florin na Fundacion Ban Uni Man pa Cria Nos Muchanan, cu ta wordo maneha pa Sr. Fun.

   E ta un Fundacion cu ta yuda muchanan cu yega scol mainta cu barica bashi, ta haya algo di come.  Gerente Glenn Croes di Pizza Hut a bisa cu nan ta haya esaki un causa hopi noble y un biaha mas nan ta sostene.

   Na su turno, Sr. Fun a gradici Pizza Hut y San Nicolas en general.  E ta orguyoso tambe, como cu e ta un persona di San Nicolas.

   El a splica cu Fundacion Ban Uni Man pa Cria Nos Muchanan a cuminza na Augustus 2001, pues e dianan aki nan ta celebrando 20 aña di existencia.  Nan a cuminza yudando muchanan di diesdos scol local, pa un total di 138 mucha.

   E cantidad di alumno cu ta haya yudanza a sigui subi, y na dado momento den e aña escolar di 2019-2020, e Fundacion tabata criando 650 mucha.  E cifra ey a keda asina te ora cu pandemia di Covid-19 a drenta.

   Ora cu scolnan a habri bek ora cu a suavisa medidanan di Covid-19, segun Sr. Fun, e cantidad a subi.

   “Awor pa e aña escolar nobo 2021-2022 nos ta na 794 mucha pa cuminza duna desayuno, cu ta consisti di un sandwich y un cos di bebe,” Fun a indica.

   E donacion di 10.000 Florin cu e Fundacion a ricibi Diahuebs atardi for di Pizza Hut, segun Sr. Fun e lo yuda sigur.  El a calcula cu e 10.000 Florin aki lo yuda 16 mucha pa henter un aña.

   Como cu nan ta bay ta yudando casi 800 mucha e aña escolar nobo aki cu ta start 1 di September 2021, e pronostico ta cu e Fundacion lo bay ta den perdida.  “Nos mester di placa, y di hopi hopi ayudo” el a bisa.   Nan calculo ta cu 150 mucha ta costa 90.000 Florin anualmente

   Pesey Sr. Fun a aprecia e gesto di Pizza Hut, y a haci un suplica na comunidad y comercio pa sigui sostene Fundacion Ban Uni Man pa Cria Nos Muchanan y haci donacion pa un bon causa.

   E recien corona Miss Universe Aruba 2021, esta Thessaly Zimmerman ta uno cu a yuda Glenn Croes entrega e check na Sr. Fun di Fundacion Ban Uni Man pa Cria Nos Muchanan, y a splica cu e ta contento cu tur esaki.