30% so di nos populacion adulto ta vacuna contra COVID-19

ORANJESTAD (AAN) – Gerrit Tromp, Epidemiologo di DVG, den conferencia di prensa tocante e update tocante e situacion actual di contagio di COVID-19 den nos comunidad, a duna informacion tambe tocante e contagionan segun edad y record di vacunacion.

Mustrando e graphic, Gerrit Tromp a splica cu e ta duna indicacion di e edad di esnan cu ta test positivo, unda e linea preto ta referi na esnan den edad mas halto cu 18 aña te cu edad di 45.

Esaki ta esnan cu aworaki ta wordo contagia mas tanto cu covid-19 y ora cu e ola actual a cuminza, nan tabata tin e rate mas halto di infeccion.

Awo por mira cu esnan cu ta den edad mas halto cu 45 aña y tambe algun di halto riesgo ta test positivo, y tambe muchanan bao di 18 aña.

Na Aruba, y otro partinan di mundo, esnan den edad bao di 45 aña ta esnan cu tin e record di vacunacion mas abao. Esaki tambe por ta e motibo pakico e virus a haya tanto espacio pa plama y ta loke a ocasiona e ola den cual nos ta awo, Gerrit Tromp a enfatiza.

Siguiendo cu e slides e Epidemiologo a duna un porcentahe di registracion na AZV, di esnan cu a test positivo despues di 15 di Juni, despues cu Aruba a haya e introduccion di variante Delta. Enberdad por wak cu hende vacuna tambe a test positivo y mas tanto esnan den edad halto. Pero esey ta un contagio mas abao cu esnan mas hoben. Akinan ta unda por wak hopi contagio bao esnan no vacuna. Esey kiermen cu nan por plama e virus entre e otronan cu no ta vacuna y por ta tambe na esnan cu ta vacuna.

Gerrit Tromp a haci un apelacion na esnan cu tin duda pakico bay vacuna, awo por wak e motibonan cu ta hopi claro.

“Eigenlijk vacunacion por yuda abo no solamente no bira hopi malo, pero seguramente pa no wordo contagia cu e virus. Ora nos ta wak e variante Delta, mi ta kere cu no ta un secreto cu e eficacia no ta mesun halto cu pa e otro variantenan, cu ta rond di 90 pa 95% pa esnan sintomatico. Aworaki ta wordo pensa cu ta rond di 70% efectivo pa preveni COVID sintomatico. Esey tambe por haci cu e ta hopi efectivo ainda pa preveni COVID severo. Esaki si ta hopi halto y a keda na 90%. Pues e ta preveni 90% di e casonan cu mester a wordo interna na Hospital, pero no mester yega eynan”, e Epidemiologo a declara.

El a termina cu un slide indicando cu eyfo ta wordo bisa cu esnan vacuna tambe ta test positivo, y tambe ta na hospital. Pero ta kere cu e motibo ta hopi claro. Enberdad un persona vacuna por haya covid-19 y por bira malo, pero e chens ta hopi mas chikito, y esey ta loke meter keda enfoca riba dje. “Apesar cu den nos grupo adulto na Aruba, esnan vacuna ta representa solamente 30% di e populacion, nan ta representa 84% di esnan cu ta rekeri di cuido medico na Hospital. Desde Juni nan ta representa 93% di e casonan cu ta drenta Cuido Intensivo na hospital y 100% di e casonan cu ta muri di COVID na Aruba, y ta hendenan bao di 60 aña, cu eigenlijk no ta suppose di a muri”, Epidemiologo Gerrit Tromp a conclui.