*Hende hoben y muchanan ta hayando e infeccion di COVID - ORANJESTAD (AAN) – Docter Wilmer Salazar, Consehero Medico na Departamento di Salud Publico (DVG), a duna un update di e situacion actual di COVID-19, na Aruba.
Docter Salazar a cuminza bisando cu e variante Delta a pega duro rond mundo, y Aruba no a scapa. Esaki, el a subraya, ta un virus hopi contagioso, y manera a premira si nos no ta tuma e vacuna, si nos no ta tuma e proteccion manera mester ta, e tin como consecuencia cu e edad di contagio ta baha, y por mira aworaki cu hende hoben, muchanan, ta hayando infeccion di COVID.
“E situacion ta birando un tiki mas grandi, y si esnan cu tin e solucion ta nos mes, por fabor bo mester haya bo vacuna y proteha, pasobra esnan cu no ta vacuna y ta haya infeccion tin e peligro inminente, cu e virus por cambia, por muta, y e lo por bira hopi mas peligroso. Esaki ta e punto di e problema, no esnan cu ta vacuna. Esnan cu ta vacuna tin e bentahanan: 1: Cu e no por haya infeccion. 2: Si en caso cu e di haya infeccion pa COVID, e sintoma ta hopi leve, e no ta complica, e no mester bay den cuido intensivo of e no ta pone su bida ni di otronan na peligro, pasobra ora bo tin e vacuna ey, e virus ta limita su contagio. E ta kibra e contagio di e virus aki, y esey ta e punto di mas importante. Mayoria di e hendenan cu a wordo contagia y cu tin sintomanan, cu ta wordo hospitaliza y cu ta den cuido intensivo ta hende cu no ta vacuna. Un porcentahe hopi grandi, cu lamentablemente, si nan lo a haya e vacuna, nos lo no a pasa den e situacion aki”, Dr. Salazar a señala.
Docter Salazar di su experiencia a conta cu su casa y yiunan tur ta vacuna. Tanto e como su casa a haya Covid, pero e no a sinti nada y su casa solamente a presenta un dolor di cabes masha fuerte mes, y su dia siguiente su nanishi tabata core, y “that’s all”. Dr. Salazar y su yiunan tampoco a haya ni un sintoma. “E pregunta ta si e vacuna ta proteha si of nos? Definitivamente cu si, y esey ta e punto di mas importante cu mester atende cune” Salazar a indica.
El a sigui splica cu Departamento di Salud Publico, conhuntamente cu Crisis Team, tin un organizacion cu a cuminza na luna di April cu yama Mobile Team. Esaki ta un organizacion crea door di e instancianan menciona, pa duna charla na empresanan, sector turistico, entre otro, tocante COVID, y kita tur duda cu tin riba dje, y cu ademas por probecha e oportunidad pa aplica e vacuna. Nan ta haci nan afspraak, nos ta duna e charla, y tur pregunta, duda y circunstancia cu nan tin, libremente nan por trece dilanti. “Tin sectornan empresarial unda tur hende a haya nan vacuna, pero tin otro cu tin un grupo dificil, cu por mas cu nan wordo splica, nan tin manera un bloke den su cerebro cu nan no kier acepta vacuna. Ni asina cu nos bise y garantiza cu e vacuna no ta bay causa reaccionnan malo, severo, ni grave pa loke ta COVID, y cu e ta bay proteha nan, nan coleganan y na nan famia incluso, den nan sector laboral, tin algun cu si y otronan no”, Salazar a menciona.
Docter Salazar a bisa cu si tin un empresa cu tin un grupo di riesgo, e por tuma contacto cu Salubridad Publico. “Nos ta organiza un charla, inclusive esnan cu kier vacuna, nos ta aplica e vacuna den e mesun lugar”, Docter Salazar a conclui.
