Fotografo Hubert Tiel a fayece lagando mundo deportivo na luto

Despues di un lucha cortico cu malesa...

ORANJESTAD (AAN): Despues di un bataya relativamente cortico cu malesa, riba Diabierna merdia e noticia tristo a drenta cu e reportero y fotografo Hubert Tiel di DIARIO a bay sosega.  El a hiba un lucha yen curashi contra e malesa, pero na final Todopoderoso a busc’e pa bay cu ne.

   Hubert Tiel tabata un persona kende pa hopi hende ta conoci pa su trabao cerca Cuerpo di Bombero na Aruba.  Pero su pasion pa fotografia ta grandi, y esey a pushe tambe pa el a drenta den mundo di prensa na Aruba.  E ta un persona cu fenomenal memoria, y por discuti cu bo riba tur sorto di asunto.  Y pueblo a mire tambe regularmente den conferencianan di prensa den temporada di Pandemia, ta haci preguntanan skerpi na gobernantenan.  Pa su trabao eynan, el a hasta ricibi reconocemento di Gobierno pa e bon trabao pa pueblo.

   Pero e amor di mas grandi di Hubert, aparte di su yiunan y nieto, ta deporte di motorsports.  Su admiracion grandi ta pa motornan rotary (‘wankelmotor’) y su hanger na e cadena rond di su garganta semper a ilustra esey.  Su trabao di saca potret, for di atardi trempan te den oranan di marduga na pista di Palo Marga Raceway Park tabata un satisfaccion p’e.  Pero su potretnan ta cuminza desde tempo cu Aruba tabata bay pusta cu autonan di careda na pista di Koral Tabak na Curaçao desde decada di 1970.

   El a lanta hasta un corant deportivo cu yama ‘Chalapi’, y a colabora cu monton di media local cu material fotografico di caredanan, como tambe vehiculonan cu tabata wordo prepara pa competi.  E tabatin costumber di pasa bishita monton di garashi rond di e isla, pa saca potret di e doñonan cu ta trahando riba nan auto di careda, como tambe motorcycle.

   Hubert tin un wowo skerpi pa tur loke ta pasa na Aruba.  Y tabata un persona kende semper tabata condena esnan cu ta benta sushi den mondi, y areanan di naturaleza.  Y e tabata saca potretnan aki tambe.

   Exactamente 1 aña pasa, Hubert a dicidi na entrega monton di material di potret historico cu el a saca, na Archivo Historico Nacional di Aruba.  Un gesto di aprecia.

   Hubert ta bay haci hopi falta, y sigur fanaticonan di deporte di motor, y hopi otro disciplina deportivo, ta agradecido pa tur su empuhe pa promove actividadnan di sport cada rato cu e por.

   Na famianan di Hubert, famia Mansur y staf y personal di DIARIO ta manda nan mas profundo palabra di condolencia.  Cu nos amigo Furai sosega na paz.