Amelia Elskamp a conkista titulo di ‘Princesa Miss Teen Americas 2025’

ORANJESTAD (AAN): Riba Diasabra anochi a tuma lugar na San Salvador, capital di El Salvador e certamen di Princesa Miss Teen Americas 2025.

   Varios pais grandi a participa den e certamen aki, organiza pa Francisco Cortez II y poni den otro den un fabuloso show.

   E comision organizador di Miss Youth Aruba, a manda nan representante Amelia Elskamp pa participa den e certamen aki.  E candidata di Aruba a bay hopi bon prepara, y na El Salvador a actua como un berdadero embahadora di Aruba.  El a haci un trabao impecabel, un berdadero reina cu no a perde su esencia na ningun momento.

   Durante henter siman pasa, el a sorprende hopi hende na El Salvador cu su aura positivo y sonrisa constant.  Su presencia ta impone, su energia ta inspira, y su determinacion a kibra tur limite.  El a demostra di ta un dama hoben yen di talento, disciplina, y un gran curason.

   Riba escenario el a briya, cu constante aplauso di publico.  Na final, el a wordo corona cu e titulo di Princesa Miss Teen Americas 2025.  Palabranan di pabien ta bay na Amelia, su mayornan, famia, y tambe na e president di organizacion local, Robin Croes Ponson.