Alumnonan di Scol Basico Xander Bogaerts a haya sa mas di nan futuro profesion

ORANJESTAD (AAN): Relaciona cu e Siman di Buki decreta door di Biblioteca Nacional, recien riba e ultimo dia di siman, a pone cu tur scol na Aruba a dedica nan mes riba e tema di “profesion”.

   Special pa yuda hobennan den escoge e futuro ‘beroep’ cu nan kier eherce, e profesionalnan di Scol Basico Xander Bogaerts na San Nicolas a organiza un mainta yena di actividad pa asina e muchanan di e scol na un forma hopi interactivo a haya sa mas di diferente profesion.

   Pa esaki, nan a haya yudanza di tanto Cuerpo Policial di Aruba, y tambe personal di Cuerpo di Bombero.

   Siman di Buki di e aña 2021 tabatin como tema: “Bira loke bo kier”

   Un tremendo tema cu ta permiti e muchanan cuminsa enfoca di awor caba riba nan profesion pa

futuro. Tur mucha por bira loke nan kier bira, si mayor- y docentenan percura pa yuda nan.

   E mainta aki por a mira con e muchanan a briya di mira cada profesion presente.  Polis, Bombero, y tambe Polisnan di unit K9.

   Scol Basico Xander Bogaerts situa den Trinitariastraat, tur aña ta sigui crece, danki na e dedicacion di tur e maestronan y sin duda su cabesante, kendenan a bin ta traha duro pa logra hopi cos pa e scol.

   Polisnan a bin cu nan unidad K9 y a drenta den cura.  Cuerpo di Bombero a yega cu nan Vehiculo di Rescate.  E lectura cu a wordo duna, y tambe presentacion di con e cacho di Polis ta yuda agentenan captura un sospechoso, a hala hopi atencion.

   Mayornan corda pa toca e tema cu bo yiu di ‘Bira loke bo kier’ pa asina di awor caba nan por stipula nan meta pa logra e profesion cu e kier.  E potretnan aki ta pa cortesia di FB Pagina di Scol Basico Xander Bogaerts.