Historia di desaroyo di mundo ta papia di cambionan grandi den tempo --- Gasto di coriente y problema medico pa hopi tipo di patient ta un hecho --- ”Sea, Sun and Sand” tres factor basico di tanto turismo como clima
ORANJESTAD(AAN)- Manera por a spera uno di e sucesonan mas importante pa mundo siman pasa, tabata uno di e sucesonan cu menos a haya atencion.
Cambio di clima. Un asunto cu pa hopi ta un storia, cu mester tene cientificonan ocupa of cu mester ta titulo di pelicula di fantasia.
A yega e momento pa hende realisa cu cambio di clima, cambio di condicionnan di bida na Planeta Tera, semper a existi.
Henter e evolucion di mundo, segun ciencia, ta basa riba cambio di condicionnan climatologico.
Cu condicionnan di clima na mundo a cambia, tur hende ta nota.
A bira mas calor. Yobida a bira mas intenso. Aruba mester ta mas cauteloso durante temporada di horcan.
Pero tin mas asunto cu tur dia ta haci hende realisa, cu situacion a cambia.
Mitar siglo pasa, ora fin di aña tabata acerca, ya camponan tabata prepara pa yobida abundante diferente for di e yobidanan di temporada di horcan.
Temperatura na Aruba tabata baha y tabata tin dia cu hende tabata nota cu tabata mas friu cu normal, sigur ora solo tabata baha y durante anochi.
Situacion a cambia. A bira mas calor pero durante ultimo decada sigur, por nota calor persistente y hasta cambio di aña mes calor cu lunan di Augustus y September.
“Sea, sun and sand” e tres palabranan cu a haci Aruba un exito den mundo internacional di turismo pero cu awe tambe ta haci cu Aruba mester bati alarma.
Ta trata di tres palabra cu directamente ta presente den tur presentacion riba cambio di clima.
Por cuminsa cu lama, cu ta menasa futuro sigur di Aruba.
Ora papia cu un aumento di calor cu un 1.5 grado, ta papia di un menasa cu lama lo subi cu 40 cm. na 2100.
Kico lo ta di Aruba si lama subi cu 40 cm? Kico lo pasa cu e “sand” na un costa bunita pero cu lo bay exigi mas teritorio di tera firme?
E situacion mundial ta serio pero tin pais cu ta grita mas duro cu otro.
Paisnan rico por tuma medida pa proteha nan costa. Medidanan cu paisnan pober no tin placa pa paga, mescos cu nan no tin placa pa paga pa resultado di mas calor cu ta mata cosecha pero tambe ta afecta salud di hende.
Cuanto placa e Arubiano mester paga na coriente awe pa e por soporta e calor, cu ta afecta personanan cu cierto condicionnan di salud? Kico e persona cu no tin placa pa paga mester paga ora “sun” percura pa calor insoportabel?
No ta papia mes di malesanan cu “sun” ta provoca, manera na tanto ocasion DIARIO a trece dilanti y cu lo bira pio mientras solo bira mas fuerte.
Condicionnan di clima no ta un asunto di Gobierno so. E ta un asunto di tur ciudadano y ta un asunto cu ta exigi mas atencion di tanto organisacion na e pais y na mundo.
No mester pone hende den panico pero si mester haci tur hende realisa kico ta spera den futuro.
Aruba por papia di cambio di clima. Na November ainda ta spera awasero cu for di October tabata cuminsa deshaci di calor.
E generacion actual di adultonan sigur ta na haltura cu ya ta tempo pa tankinan cuminsa yena.
Kico a pasa?
Un conferencia importante a uni mundo siman pasa y a confronta mundo cu un realidad. E contesta ta den man di hende, cu mester acepta realidad y mester uni su mes na cambionan cu mester bolbe reemplasa loke a cambia den historia di mundo y di Aruba tambe.
Mester bolbe campo y mester proteha campo cu ta na peliger mescos cu lama y e naturalesa cu a haci Aruba conoci rond mundo pero awe mester di yudansa di hende pa garantisa e futuro feliz di hende.
