Un gran baluarte di Aruba
ORANJESTAD (AAN): Manera cu DIARIO a trece dilanti caba, tabata siman pasa cu e tristo noticia a drenta cu e gran baluarte, y sigur legendario yiu di tera, Jose Wever conoci como ‘Buchi Panama’, a fayece.
Pa hopi hende, Buchi Panama ta worde considera como e catalisador solido cu a pusha pa asina Futbol infantil a haya bida na Aruba na un forma organiza, y el a traha cu alma y cuerpo, envolviendo su famia, pa asina hunto cu miembronan di comision a logra lanta e liga di LIFIDA cu a lucha pa haya reconocemento, y despues a bira sinonimo di futbol infantil pa Aruba.
Muchanan ya for di 5 aña di edad por a cuminsa hunga wega den teamnan, cu reglanan simplifica pa asina duna e muchanan e smaak pa sigui train dos biaha pa siman, y hunga un wega den fin di siman pa asina sostene nan team.
E amor di Buchi pa deporte rey di Futbol, a bin desde cu e mes tabata coach pa algun team na Aruba. Buchi hopi biaha tabata haci esfuerso pa su team, y despues pa e liga di LIFIDA, riba su mesun cuenta. Un persona cu a inspira y a facilita hopi hoben nan pa participa den futbol, y alabes tabata pone enfasis constantemente riba disciplina! Esaki DIARIO a yega di mira cu propio wowo, ora cu un hoben yega tiki laat pa training, e ta obliga pa saluda tur coach, y su amiguitonan di team. Esey ta algo cu Buchi semper a exigi di e muchanan, pa asina nan siña loke ta respet y disciplina. Y pesey mes tur hende cu yega unda cu Buchi ta, mesora ta saluda Buchi. Y claro cu Buchi tambe ta saluda bek.
Buchi tabata busca semper e mihor pa LIFIDA, hasta si esey nifica cu e ta busca pleito cu patrocinadornan pa asina check si nan por pone un suma aun mas grandi riba nan cheque di donacion.
E nomber di “Panama”: E empuhe y determinacion aki pa traha incansablemente sin sinta keto, pa hopi hende a bira e ‘estilo’ di Buchi Panama, na aña 1950 ora cu el a haye ta drief perdi pa 29 dia riba lama abordo di un boto di bela cu 2 amigo mas, y segun tur hende, el a drief y hasta yega cerca di Panama. Pesey e nomber “Panama” a wordo agrega tras di nomber di Buchi.
Jose Francisco Wever a nace na Aruba dia 30 di Juni 1929, pues tin 94 aña di edad. Varios decada pasa riba un anochi cu e tabata gozando di un combersacion na un brindis cu amigonan, e decision a cay inespera pa nan bay na e Pier na Savaneta, subi un boto di bela (sin autorisacion di e doño Chico Ras) y bay lama e ora ey “pa trata na yega na Colombia”. Buchi a indica cu normalmente e lo no subi un boto pasobra e no por landa, pero e anochi ey como homber soltero cu a caba di dal par di drinks, e tabatin briyo inespera. Y e locura di purba bay cu boto pa Colombia ta algo inusual pe.
Asina Buchi, cu Yendi y Simon Maduro a bay na oriya di lama na Cura Cabay, y cualkier boto cu nan a haya mara eynan, nan a subi abordo y cu Yendi na timon a bandona Aruba e ora ey den nan locura cu meta pa bay Colombia. Pero ora di yega pabao di Aruba, envez di bay zuid rumbo pa Colombia, nan a bay den coriente di lama cu a hiba nan mas panort.
E boto aki di 19 pia, ta djis uno di bela, pues no tin nada di VHF Marine Radio, ni ningun medio di comunicacion. E tempo aya ainda Celular no a wordo inventa mes.
Nan a keda hopi riba lama grandi cu a keda pusha nan bay pabao. Den e 29 dianan ey, nan a keda drief sin rumbo ta sigui bay west segun cu coriente di lama, y biento ta pusha nan. Pa colmo e bela grandi a kibra pabao di Aruba, y nan a keda solamente cu e bela chikito, cu ta wordo yama ‘jib’. Pero despues e timon tambe a worde destrui door di olanan fuerte. Asina e boto a djis keda eynan ta drief fo’i control. Dianan di pena, cu casi nada di cuminda, solamente pisca bulado cu tabata bula y cay den nan boto, y usando tactica cu boternan di plastic abordo di e boto pa laga esaki “soda” den lama pa asina haya poco awa paden pa bebe.
E curpa humano por keda biba basta tempo sin cuminda, pero awa si ta necesario tur dia pa bebe. Y den e tragedia aki, lamentablemente capitan Yendi no por a soporta e situacion, a bira malo y a fayece. Tanto Buchi cu Simon a keda na bida yen di agonia, y como cu solo ta dal nan duro, e curpa di Yendi a cuminsa hincha.
E ora Buchi y Simon a tuma e decision fuerte, di loke hopi antepasado tabata haci tempo di nabegacion, esta di benta e curpa morto den awa y lag’e bay. E ora ey nan dos a keda cu e agonia di purba keda bibo, y cu speransa di por wordo rescata.
Yegando mas pabao, diripiente lama bruto a converti su mes den lama basta keto, y nan a cuminsa sinti nan mes mas safe den e boto, y sperando di por wordo rescata. Buchi semper a papia cu nan a keda cu hopi fe durante e dianan largo aki riba lama, pasobra e ta traha mentalmente tambe riba bo, como cu bo ta mira solamente lama tur rond di bo.
Esey a socede tambe, y cu alegria na di 29 dia a wordo rescata door di un barco, na como 300 miya leu for di Colon, Panama. Esey nifica cu e boto di bela aki a cruza e lama full panort di Colombia for di Aruba y a yega te Panama.
Di e forma ey nan a wordo baha na Panama, y contacto a ser haci cu Aruba pa notifica nan cu Buchi Wever y Simon Maduro a wordo rescata. Di e forma ey famianan a bin trankilisa. Y ademas di e tempo ey, Buchi a haya e apodo di ‘Buchi Panama’ debi na e odisea aki.
Despues di a regresa Aruba, Buchi a drenta enlace matrimonial y a haya 5 yiu muher y 2 yiu homber.
Amor pa Futbol: E amor pa futbol di Buchi Panama ta e motibo pakico Aruba a competi den exterior cu seleccionnan infantil y hubenil. Pa mas di 30 aña, e tabata dirigente di LIFIDA te ora cu Arubaanse Voetbal Bond a dicidi na incorpora e grupo aki den nan divisionnan, y a keda cu Buchi como un consehero, kende alavez a keda wordo considera como Tata di Futbol Infantil y Hubenil.
El a organisa diferente Torneo Internacional na Aruba tambe, cu participacion di diferente pais. E potret aki saca na September 2008, den un entrevista cu DIARIO, el a bisa cu su deseo tey keto bay pa un dia LIFIDA haya su mesun Stadion. Y el a bisa cu e ta fervientemente contra pa nan duna e Stadion nobo ey e nomber di “Stadion Jose ‘Buchi’ Wever” of algo asina. E ta djis anhela e stadion wordo construi pa yuda muchanan den nan deporte, y no como un showcase pa su nomber briya riba dje.
Ora di pidi’e pa un potret na final di e entrevista, manera semper cu su jacket di Aruba bisti, e ta hisa su dede di aprobacion y duna un sonrisa grandi. Danki Buchi Panama, bo trabao pa Futbol Infantil y Hubenil na Aruba ta inmenso. Sosega na Paz, y condolencia na henter famia, amigo- y conocirnan di Jose ‘Buchi’ Wever.
