Alumnonan di Maria College MAVO a resalta cu nan talento den e 'STREAM Fair & Open Dag'

Prome Minister Evelyn Wever-Croes:

ORANJESTAD (AAN): Diabierna anochi Prome Minister Evelyn Wever-Croes a atende e STREAM Fair & Open Dag di Maria College MAVO. Durante e anochi interesante aki e studiantenan a haci demostracionnan di e materianan cu nan ta studiando den klasnan di STREAM.

            E anochi a habri unda Prome Minister a haya un splicacion di kico ta STREAM. Prome Minister ya tawata conoci cu e concepto STEM (Science Technology Engineering Math), despues a añadi e “A” di Arte y esaki a bira STEAM y actualmente a añadi e “R” di Reading y e concepto awor ta STREAM cual den su totalidad ta significa: Science, Technology, Reading Engineering, Art, y Math.

            E studiantenan di STEM a demostra kico tur nan ta siñando den e materia natuurkunde y biologie y a duna demostracionnan y presentacionnan hopi interesante. Aki Prome Minister a gradici e alumnonan di a dun’e e oportunidad di wak un celula bou microscoop cu tawata un experiencia hopi special p’e y a trece recuerdonan di tempo el a studia medicina.

            Den e area di lesamento, Prome Minister por a wak e forma cu Maria College ta uza pa asina stimula e lesamento cerca e alumnonan y haci e materia di Hulandes mas interesante cerca e hobennan den forma di weganan interactivo. Pa loke ta trata e materia di arte, cada klas mester a presenta un piesa di arte y aki por a mira e talento cu a sali for di cada alumno. Esaki pa medio di piesanan di arte impresionante di diferente tecnica, diferente material, diferente tema manera paisahenan, naturalesa, arte mosaico y hopi mas.

            Prome Minister a expresa cu e anochi aki tawata uno interesante, yena cu informacion y enseñansa, y cu tawata hopi bunita pa wak studiantenan contento y orguyoso di por a demostra nan talentonan. Prome Minister a pone enfasis y a gradici e docentenan cu e bon enseñansanan na e studiantenan ya cu por a mira e refleho di esaki durante e anochi aki.

            “Un pabien na Maria College pa organisa e evento aki, pero specialmente un pabien na e alumnonan, cu a resalta nan talento den e STREAM Fair & Open Dag. Mi ta sigur cu nan ta bay tin un futuro briyante”, Prome Minister a expresa.