ORANJESTAD (AAN): Educacion inclusivo ta pa tur mucha, no obstante nan limitacion fisico. Esaki ta locual cu SKOA ta kere aden y
ta traha duro pa por cumpli cu e compromiso aki, pa asina tur mucha ricibi e educacion cu nan tin mester pa desaroya y forma parti di nos sociedad.
SKOA ta brindando guia y sosten special na diferente mucha cu limitacionnan entre otro di bista, oido of incapacidad fisico. Muchanan cu tin limitacion di bista, ta haya guia special di FAVI. SKOA tin un lista amplio di scolnan cu ta ricibi e guia aki for di FAVI pa asina nan muchanan por wordo yuda a base di nan nivel di limitacion di bista.
E obhetivo principal ta pa guia y sostene cada mucha a base di nan necesidad specifico, asina aki FAVI por ofrece un guia completo pa tur mucha por desaroya y crece den personalidad como tambe e parti academico.
FAVI ta yuda muchanan di SKOA cu entre otro material di les cu ta wordo traha specialmente pa cada nivel di educacion cuminsando for di kleuter te cu scolnan secundario. Muchanan cu ta haya e guia aki ta wordo asisti personalmente durante oranan di scol y tambe ta haya guia special ora ta trata di examen cu nan mester traha pa por sigui eleva di klas.
Scolnan cu ta resorta bou di SKOA cu ta hayando e sosten di FAVI ta: Scol Preparatorio Prome Paso, Colegio Pastoor Kranwinkel, Colegio Sagrado Curason, Rosario College, Colegio San Augustin, La Salle College y Scol Caiquetio.
Si abo ta un mayor cu un yiu cu ta bay cuminsa scol y cu tin limitacion di bista, pasa na SKOA pa asina haya mas informacion di e guia cu e mucha por ricibi di FAVI.
