ATA a firma acuerdo strategico cu Fundacion Parke Nacional Aruba

ORANJESTAD (AAN): Dialuna atardi, Aruba Tourism Authority a anuncia cu a firma acuerdo di un aña cu Fundacion Parke Nacional Aruba (FPNA).

E vision di A.T.A. ta basa riba e modelo di ‘High Value-Low Impact’ cu ta para pa un balanse entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.

   Pa hopi aña caba A.T.A. ta provee sosten na FPNA pa cu inversionanan den proyectonan unda turismo y naturalesa por co-existi. Ademas A.T.A. lo sigui pone fondonan disponibel pa mantencion y renobacion di diferente sitionan turistico, asina mehorando seguridad, accesibilidad y experencia di e local y bishitantenan di e isla y alavez maneha e impacto di e bishitantenan riba naturalesa. E acuerdo cu a firma ta enfoca riba proyectonan infrastructural, manera e proyecto di mantencion di railing,trapinan y otro facilidadnan na entre otro Conchi, Dos Playa, Boca Prins, Grot Fontein y Grot Quadirikiri den Parke Nacional Arikok, y tambe lo coloca “barancanan” na saliña Malmok pa limita trafico.

   Como e entidad encarga cu maneho y mercadeo di nos isla, A.T.A. lo asisti tambe den promocion corecto di experencianan autentico den y rond di e areanan cu ta resorta bou di FPNA. Particularmente lo percura pa alineacion den esfuersonan di comunicación, lo enfoca riba codigo di conducta informando bishitantenan di entre otro reglanan y ley, y lo brinda mas informacion y educacion referente nos parhanan y nos naturalesa. 
   A.T.A. lo pues sigui traha di cerca cu FPNA pa maneha bishitantenan di un manera cu ta minimalisa daño na naturalesa y medio ambiente mientras ta promove sostenibilidad. Esaki mescos cu a bin ta haci, unda entre otro a inverti den Mangel Halto, y tambe a coloca “boulders” na Sasarawichi. 

   E colaboracion strategico aki ta nifica tambe cu A.T.A. lo obtene informacion y data mas concreto di bishitantenan atravez di un proyecto nobo cu lo lansa otro luna, esta e eco-counter cu lo midi e fluho di bishitantenan na e areanan natural di Aruba y abilita pa adapta maneho den futuro. Atravez di instalacion di Eco-Counter na diferente localidadnan cu trafico halto di bishitante, A.T.A lo por provee data cu lo yuda cu mihor planificacion. E Eco-counter ta ofrece un solucion cu ta conta y analisa peatón atraves di un scan cu ta garantiza e privacidad di bishitantenan. E areanan cu lo mira instalacion di e Eco-counter ta inclui Conchi, Grot Fontein y Spaans Lagoen, pa cuminsa, cu ta cay bou di maneho di FPNA.

   “Nos ta sumamente entusiasma pa sigui colabora cu FPNA den nos mision mutuo pa preserva y proteha nos tesoronan natural y nos medio ambiente. Esaki ta un paso importante pa nos comunidad y turismo di Aruba den su totalidad. E acuerdo di colaboracion aki ta cubri un total di mey miyon Florin cu ta inverti pa duna sosten y realse na e causa comun y ta un muestra di compromiso entre A.T.A. cu FPNA, un compromiso cu ta ancra den A.T.A. & FPNA su plan di maneho multi anual”, tabata palabranan di CEO di A.T.A. Ronella Croes na e ocasion aki.

   “Fundacion Parke Nacional Aruba como un organizacion independiente di maneho di conservacion di naturalesa den areanan terrestre y marino na Aruba ta sumamente contento di por firma un acuerdo di colaboracion cu A.T.A.”, Tyson Lopez, Chief Executive Officer, FPNA ta comenta. E colaboracion lo reinforsa FPNA su direccion manera ta poni den nos Multi Annual Corporate Strategy 2023 – 2032 di traha pa yega y atrae un tipo di turismo cu ta mas conciente di nan impacto riba naturalesa door di informa, educa y ofrece experiencianan sostenible cu ta crea e transformación den nos bishitantenan cu tin un aprecio sosteni y un sentido di responsabilidad pa naturalesa.