Alumnonan di Maria College investigando comportacion di animalnan

ORANJESTAD (AAN): Recientemente e alumnonan di Ciclo Avanza-1 di Maria College MAVO,

a subi bus y a acudi na Philips Animal Garden na Alto Vista pa haci un tarea practico pa e vak di Biologie na scol.

   Nan a bay haci un “investigacion di comportacion” riba diferente bestia cu tin eynan.

   E investigacion aki ta ser yama ‘Gedragsonderzoek’, y e ta wordo yama tambe etologia of biologia di comportacion.  E ta un disciplina cientifico cu ta dirigi su mes riba e estudio di comportacion di animalnan den nan ambiente natural.  E ta wordo haci tin biaha den laboratorio tambe.

   Meta di esaki ta pa haya sa di e motibo, funcion, y evolucion di e comportacion di bestianan.

   Hecho ta cu animalnan ta mustra hopi forma di comportacion, manera nan ta hunga, ta bringa, ta come, y ta cana.  Tur e formanan aki di comportacion ta wordo yama ‘elementonan di comportamento’.  Cu yudanza di e elementonan aki bo por observa y describi completamente e comportacion na un forma bastante exacto.

   E alumnonan di Maria College MAVO sa cu e meta di e tareanan practico, ta pa nan mes aplica e teoria cu nan a siña den les, den bida real.