Adela Orman ta ricibi merito special di aprecio for di staff di Playa Linda Resort

Lazonan duradero di e famia di e resort

ORANJESTAD (AAN): Adela Orman tabata un figura conoci den Departamento di Housekeeping di Playa Linda Beach Resort pa mas di 30 aña prome cu su pensioen. Su personalidad fuerte y instinto pa cuida hende a causa un impresion, y e tin masha hopi admirador entre tanto e bishitantenan di e resort como su coleganan.

   Lasonan comparti entre Adela y su famia di Playa Linda a keda fuerte, conduciendo na un bishita recien na su hogar, como un gesto di apoyo y sosten, door di Executive Housekeeper Ingrid Todd, Operations Director Sulaika Kelly y General Manager Peter van Grinsven.

   Su pensioen na 2020 tabata mas bien consecuencia di asunto relaciona cu su salud, pero su personalidad a mantenele hopi cerca den mente y curason di su famia di Playa Linda.

Regularmente ta conta storianan afectuosamente di su tempo na Playa Linda y su intachabel espirito.

Adela a tuma e tarea di un fulltime housekeeper na 1988, na un hoben edad, pero cu un determinacion indestructible pa sobrepasa cualkier reto. Su persistencia y voluntad pa ofrece lo miho di su mes, como tambe mehora su mes, tabata evidente desde e prome instante.

   “Un di su desafionan tabata lesa y skirbi, pero el a gara e toro na su cachonan, trahando na Playa Linda mientras mesun tempo tumando curso despues di trabou y fin di siman, y e la keda riba dje tres aña largo te ora el a logra su meta,” asina Executive Housekeeping Ingrid Todd ta comenta admirando di su amiga y ex-colega. “Despues di logra e meta ey, el a tuma un otro reto, primitiendo di completa un caminata di San Nicolas te na Playa Linda. El a cumpli cabalmente cu e meta ey tambe, cu amigo, famia y coleganan di trabou mas cu feliz pa apoy'e a lo largo di e ruta.”

   Su carera na Playa Linda tabata similarmente marca pa puntonan halto, incluso gana e "Award of Excellence", otorga e tempo ey pa gobierno di Aruba su Quality Assurance Foundation. Semper el a keda un personalidad genuino y franco, kende firmemente a transforma un aparencia exterior bruto manera e mes ta bisa, den un abilidad refina pa sirbi hospitalidad y hopi biaha tabata super complaciente y proactivo pa satisface e expectativanan di mas halto di bishitantenan.

   “Adela, cu tur su merito, ta considera di tin e titulo maximo di ‘Queen of Playa Linda forever’, esta Reina Eterno di Playa Linda, y ...ta berdad,” asina Operations Director Sulaika Kelly a comenta, “Su amor pa Playa Linda y tur su huespednan y su coleganan ta sin precedente. El a gosa di su trabou inmensamente y esey tabata mas cu obvio y evidente den e tantisimo evaluacionnan positivo ricibi den sondeonan di bishitante. Hasta cinco aña despues, ainda nos tin bishitantenan cu ta papia di dje y elogia su obranan.”

   E amor cu Adela tabata demostra cada dia na su trabou a keda reciproca di henter curason. Executive staff tabata contento di personalmente bishita Adela y reafirma e sosten y afecto cu ainda e ta mantene cu su famia Playa Linda. Adela ta keda un ehempel di con un solo persona por crea olanan di resultado positivo, apesar di desafionan di bida, ora cu ta inspira pa fortalesa, bon humor y resiliencia. Como aprecio pa tur aspecto di su personalidad unico, Playa Linda ta orguyoso pa manten'e como parti di e famia extendi di e Resort.