Alumnonan di Ciclo Basico 2 di Colegio San Augustin a bishita Parlamento

ORANJESTAD (AAN): Den cuadro cu e tema “De overheid” cu a trata den Ciclo Basico 2 (klas 2),

den e tercer trimester di e aña escolar aki pa e materianan ASW y ASW-Economie, a acerca Parlamento pa asina e alumnonan di Colegio San Augustin por a haci un bishita.

   E meta di e bishita aki ta pa asina e alumnonan por cera conoci cu nos Parlamento, pa haya sa mas di cerca kico ta e tarea di e organo mas halto di nos Pais y kico por spera di su gobierno.

   E alumnonan a worde hopi bon ricibi y nan tabata hopi entusiasma pa por a sinta den e stoelnan, haya informacion y scucha tur conseho. Tambe na final e alumnonan a haya oportunidad pa haci pregunta cu nan tabatin na e parlamentarionan.

   Preguntanan cu a bin dilanti tabata preguntanan tocante entre otro: nos medio ambiente, trahamento di mas hotel na Aruba, vision y plan pa San Nicolas, salud mental bou di hubentud, recorte di 12,6%. Tambe e alumnonan a haya oportunidad di vocifera riba e futuro di San Nicolas.

   Ta di remarca cu algun alumno a laga sa cu e stoel a sinti hopi dushi y cu nan lo ta interesa pa participa na eleccion electoral di Aruba pa asina por haya e chens pa bira parlamentario y yuda hiba Aruba dilanti.

   Colegio San Augustin pa medio di su docentenan juffrouw Holsman, meneer Nicolaas y juffrouw Franken kier a gradici parlamento pa a haci e bishita aki posibel.

   Un danki special ta bay na parlamentario señora mr. Gerlien Croes (AVP), parlamentario señora Aquanette Gunn (MAS), Presidente di Parlamento señor mr. Edgard Vrolijk, parlamentario señor Alvin Molina (MEP), parlamentario señor Raymond Kamperveen (RAIZ) y parlamentario señor Marco Berlis (MEP) pa nan aporte.