ORANJESTAD (AAN): Diamars mainta hunto cu mi colega parlamentario sr. Alvin Molina nos a reuni cu Director di Desaroyo di Eagle LNG,
sr. Alejandro Bastardo, pa asina e por a comparti informacionnan nobo cu nos riba e progreso y avanse di e proyecto.
Manera ta conoci Eagle LNG lo provee gas natural pa WEB Aruba NV su plantanan Recip cu lo funciona cu e fuel aki. E cambio pa Gas Natural lo representa un reduccion enorme den e contaminacion di nos medio ambiente compara cu e HFO cu WEB ta usando na es momentonan aki. Tambe e lo reduci e cantidad di consumo di 3.600 bari pa 1.350 bari pa dia di combustibel. Esaki lo traduci den prijsnan stabiel y pagabel pa pueblo di Aruba.
Eagle LNG den su ultimo fase di environmental studies: E bon noticia ta cu e compania di Eagle LNG ta den su ultimo fase di environmental studies. Nan ta proyecta cu esaki lo conclui probablemente den e ultimo kwartaal di e aña aki. Den e studio aki ta colectando data di posibel preocupacion, obstaculo y obhecion di ciudadanonan y otro instancianan.
Esaki ta importante pa asina ora cu haya aprobacion di parti di tur instancia pa cuminsa traha e facilidadnan y pone e tubonan di gas no lo tin ningun contratiempo mas di e banda ey. “Pe motibo aki,” segun sr. Bastardo, “nos ta tuma e tempo necesario pa haci e estudionan bon”. Nos ta explora y ta cana cada meter di e rutanan posibel cu e tubonan aki por tuma, pa asina nos por tin un bon idea kico tur nos por haci pa e tubonan aki por worde poni exitosamente segun e normanan halto di seguridad internacional.
Con e tubonan di Gas aki ta bay worde poni: Esaki ainda no a worde dicidi oficialmente ainda pasobra ainda e estudionan falta algun informacion crucial cu lo worde compila den e ultimo lunanan aki pa asina e compania por tuma un decision responsabel. Eagle LNG ta pendiente pa tur e informacion drenta cerca su expertonan pa asina pronto nan por tuma nan decisionnan final y comunica esaki na e comunidad di Aruba. Eagle LNG ta considerando cuatro diferente ruta pa e tubonan di gas por worde poni entre San Nicolaas y WEB Aruba NV.
Kico lo sucede ora cu e estudionan aki termina:
Manera cu e estudionan termina, lo haci e anuncionan oficial con lo bay pone e tubonan y ki ruta lo uza. Adicionalmente e parti di limpiesa di e tereno por cuminsa, riba cual lo cuminsa construi e terminal pa store e LNG gas. Esaki ta e fase di construccion cu lo por genera trabaonan pa companianan constructor local y ta proyecta cu esakinan lo dura mas o menos 2 aña pa termina.
