Alumnonan balente den hardin di fruta y berdura di Scol Basico Washington  

ORANJESTAD (AAN): Na Scol Basico Washington tambe tin un hardin di fruta y berdura,

cu a cuadra den e plan di Agroforesteria pa asina empuha hobennan di edad chikito pa percura pa nan tin mas amor pa e trabao di planta y cosecha despues tur loke tera ta dunabo.

   Scol Basico Washington a hasta duna e hardin un nomber, y e ta conoci awor como ‘Cunucu di SBW’.  Tambe ta asina cu tur dialuna ta toca turno di un klas pa bay yuda den e Cunucu di SBW.

   E siman aki tabata turno di Klas 6-B, y prome cu e alumnonan a drenta e Cunucu, nan a haya un splicacion cortico di kico e meta di e cunucu ta.

   Despues bou guia di e voluntarionan di Living Soil Aruba, meneer Rhyan y juffrouw Eve, e muchanan a pone man na obra. Un rato educativo sigur.

   Plantamento di mata ta ofrece un oportunidad practico di siñamento cu ta haci grandi e conocemento di muchanan di biologia, ecologia, y ciencia di medio ambiente.  Nan por observa con matanan ta crece, y kico ta afecta nan bienestar.  Platamento di mata por uni grandi y chikito den un esfuerzo conhunto.