Dia Internacional di No-Violencia:
ORANJESTAD (AAN): Awe, 2 di october ta Dia Internacional di No-Violencia, un dia pa honra e bida y legado di Mahatma Gandhi—un lider cu a lucha pa husticia na manera pacifico. E dia aki ta sirbi como un recordatorio cu balor di paz, comprension y dialogo ta fundamental pa un sociedad fuerte.
Pa Aruba, un isla trankil y hospitalario, e mensahe di no-violencia ta hopi relevante. Cu mas di 90 nacionalidad bibando aki, Aruba ta un ehempel di con bida den union y diversidad por existi den harmonia. Pero nos mester sigui traha riba e fundeshi di respet y tolerancia, no solamente den politica, pero tambe den nos bida diario.
No-violencia ta cuminsa cu nos palabra, nos actitud, y manera nos ta trata otro. Na scol, cas, trabao y riba rednan social, nos por scoge pa sembra paz y comprension.
Laga 2 di october sirbi como inspiracion pa sigui bira un comunidad unda nos por biba hunto den union. Aruba por sigui luci como un ehempel pa mundo di con paz y amor pa cada ser humano ta e caminda pa un miho futuro.
