OPPA a organisa un encuentro special pa su miembronan 85+

En Conexion cu Dia di Adulto Mayor

ORANJESTAD (AAN)  En conexion cu celebracion di Dia di Adulto Mayor, un dia dedica pa honra y aprecia e aporta na nos adultonan mayor den comunidad, e Organisacion di Pensionadonan Publico Arubano (OPPA) a tuma iniciativa pa brinda un momento di union y reconocemento na un grupo hopi special di su miembronan.

Na Aruba, OPPA ta e entidad cu ta defende y representa e interesnan di pensionadonan cu a traha den sector publico, garantisando cu nan bos ta wordo scucha y cu nan bienestar ta na prome luga.

Pa celebra e dia importante aki, OPPA a organisa un encuentro dedica exclusivamente na su 459 miembro cu tin 85 aña of mas. Señor Ivo Valdes, Presidente di OPPA, a bisa cu e grupo aki usualmente no ta asisti na e otro actividadnan di e organisacion, y precisamente p’esey, nan merece un evento special pa nan.

Mas di 50 miembro a tuma parti den e celebracion, unda nan a pasa un dia agradabel, yen di alegria, compania y reconocimiento, hunto cu OPPA. Nos grandinan ta nos inspiracion pa sigui construi nos pais. Nan merece miho.