Alumno di EPB Hato a traha duro y crea su mesun Electric Bike

ORANJESTAD (AAN): Diaranson anochi a tuma lugar den e localidad cu awor ta conoci como ‘EPB Ballroom’ na Hato, e anochi di Graduacion pa tur esnan di Unit Techniek na e scol di educacion profesional aki.

   Cabezante Erwin Lopez a laga pone airco den e lokaal aki cu antes tabata cantina.  Awor el a comberti su mes den un berdadero Ballroom cu un escenario tambe.  Y na tin plan pa den futuro cercano huur esaki tambe pa esnan cu kier pone fiesta eynan anochi.

   Durante e ceremonia di graduacion, por a nota con e Mentor Sr. Chong di EPB Oranjestad a elabora cada biaha riba e perseverancia cu diferente alumno tabatin durante cu nan ta na e scol.  Incluyendo algun alumno cu ta asina balente, cu nan mes ta ofrece nan yudanza pa cualkier tarea cu tin di ser haci.

   Tambe Mentor Chong a mustra riba un di e hobennan cu a bin cu un motor electrico di cas, caminda e mes a experimenta riba dje, torno full e motor for di otro, pa despues arma esaki completamente bek pa e funciona, y el a instala esaki riba un bicicleta cu e tin.  El a pone bateria, y diripiente el a crea un Electric-Bike pe mes.

   Cu esaki e tabata bay scol y esaki a laga su docentenan y tambe e mentor hopi impresiona.  Pesey mes Mentor Chong tabata orguyoso cu e alumno ey tambe a gradua Diaranson anochi pa Unit Techniek.