ORANJESTAD (AAN) – Den un ambiente natural, elegante, na aire liber y hopi agradable, den Restaurant Papiamento su area pafo, señor Clifton Ling y su señora Ingrid Ling, a presenta e buki “Ling Legacy, a Journey of Family, Food and One Happy Island”, diabierna anochi.
E Joya di buki aki a nace for di un idea di señora Ingrid despues cu nan a baha cu pension, di nan mes negoshi, na aña 2012 y nan a probecha pa biaha na hopi lugar durante dos aña largo.
Manera ta conoci Clifton y Ingrid tabata pa hopi aña completamente ocupa y druk, den e empresa familiar cu ta e Supermercado Ling & Sons. Na aña 2014 señora Ingrid a puntra su casa: “Kico nos ta haci next?” Pasobra ora nan a bin cas despues di e dos añanan cu a bay biaha, nan no tabata tin nada pa haci. E ora ey a surgi e idea di señora Ingrid, pa traha un buki di e cas unda nan ta biba, cu tabata prome e cas di e director di Shell. Pero nan a bay busca tur archivo di e cas y no tabata tin nada. E ora ey Clifton a puntra Ingrid pakico no traha un buki di Ling & Sons, pasobra esaki ta un historia cu e conoce hopi bon mes, y e ta un historia di famia. Na 2014 e pareha Ling a cuminza skirbi e buki pero a haci un compilacion di e historia familiar prome, desde cu e mayornan di señor Clifton a bin Aruba cu nan yiu mayor, y a lanta un prome supermarket na San Nicolas, mientras cu e famia a crece cu cuater yiu naci na Aruba. Nan tur a lanta akinan, a bay scol local y sigui den exterior, te cu a forma nan mes famia, y asina sucesivamente cada ken tin su propio capitulo den e magnifico buki aki.
E buki aki ta dedica na e memoria di e hopi stima “Papa Ling” Chao Yang y “Mama” Ling Sue Lan. Pa e generacionnan siguiente di e famia Ling, Papa y Mama Ling a briya cu nan ehemplo di kico por logra cu tenacidad, trabao duro y compromiso. Na e legado aki a contribui grandemente e yiu homber mayor di e mayornan Ling, Jimin Ling, cu fisicamente a laga su famia na December 2017. Su vision y innovacion pionero tabata e fundeshi pa e trabaonan preparatorio y e caminda exitoso y largo di Ling & Sons. Na dje y e memoria di su mayornan, Clifton y Ingrid Ling ta desea di haci husticia atravez di e buki aki, na nan memoria.
Manera ta conoci despues cu e di dos yiu di Clifton y Ingrid a tuma su mes bida, treciendo un dolor inmenso cerca e famia y tur cu a conoce, su tata a lanta e fundacion “Jordan Ling Foundation” cual meta ta yuda e instancianan local cu ta traha cu problemanan di salud mental. E buki aki lo ta na benta den e librerianan local y e producto di esaki lo wordo inverti cien porciento, pa e Fundacion aki sigui sostene e tereno di salud mental na Aruba.
Lamentablemente, a sinti e ausencia di otro miembro di e famia, Yolanda Ling (awo den feliz memoria), ken tambe a forma parti di e staf di Ling & Sons y a forma parti di e Fundacion. Su yiu muhe Sharlene a hiba palabra tocante e Fundacion Jordan Ling y su meta. Clifton Ling a hiba un interesante discurso tocante e historia encera den e buki, e inicio di Ling & Sons mas cu 50 aña pasa y tur su desaroyo exitoso di ampliacion, renovacion y innovacion na 2003, cu por cierto e Gobernador di e tempo ey señor Olindo Koolman, hunto cu su señora Dora Koolman, a corta e cinta. Señor Koolman, ora a ricibi un ehemplar di e buki, tambe a hiba palabra y conta parti di e historia aki. Ex-gobernador Fredis Refunjol tambe a haya su ehemplar y a expresa palabranan di pabien y admiracion pa famia Ling, y gradici pa e joya di obra aki, y director di Archivo Nacional Aruba, Raymond Hernandez tambe a keda hopi contento cu adkisicion di un ehemplar, cu lo haya un bon lugar na ANA, y el a expresa cu ohala mas hende cu tin historianan tocante loke nan a logra, contribuyendo na Aruba su desaroyo, lo skirbi tambe nan testimonio.
