Alumna agredi victima di bullying a haya politraumatismo den su cabes

Mama di e hoben agredi cu fuerte declaracion:

ORANJESTAD (AAN) — Sully Bedoya, mama di e hobencita cu a wordo agredi pa otro alumnanan di e scol MAVO, na cual e ta asisti, a yama un conferencia di prensa cu a tuma lugar den e parkinglot di Hospital Dr. Horacio Oduber, mientras cu su yiu ta interna.

            Señora Sully a expresa cu e ta haci su declaracion cu tur respet pa e pueblo di Aruba, un gran pais cu a dun e acogida hunto cu su yiu.

            E hobencita ta alumno di Maria College MAVO, y diamars, saliendo for di e instalacionnan di e scol su yiu a wordo agredi pa dos compañera di klas. E dama a splica cu lunanan atras ya caba tabata tin intercambio entre e hobencitanan aki cu tabata di ambos banda: di su yiu y di su compañeranan di klas.             Señora Sully a menciona cu el a dirigi su mes na e Institucion pa pidi ayudo y a bisa nan cu e kier papia cu e representantenan di e agresornan di su yiu. Pero e  no a wordo scucha.

            Den varios ocasion su yiu a bira victima di bullying door di su compañeranan, y su yiu mes a bay pidi ayudo na e direccion di scol. Esaki a bin ta pasando caba pa varios luna atras. Den pauze, e muchanan a bisa su yiu “awo si nos ta bay caba cu bo”!      Su yiu a spanta y a bay cerca e cabesante di scol, ken a yama e dos alumnanan cu a amenas'e, no obstante, Diamars pa 2.30 or di atardi, dia 15 di Februari, su yiu a wordo agredi saliendo for di scol, cu premeditacion y alevosia door di su agresornan.

            Sully a bisa cu riba e mesun video cu a bira viral den e rednan social y cu prensa tambe tin e, y cu a wordo graba pa otro compañera, cu e dama ta kere cu tambe mester haya castigo pasobra graba dentro di e scol un malhecho cu nan a haci otro alumno.

            Su yiu, na e momento ey a wordo golpia, nan a hala su cabey, e tin como cinco politraumatismo den su cabes, no por move su cabes y mester a bay terapia. E docternan no ta bay lagu'e sali ainda y nan ta wardando e psicologo. Sully ta wardando riba e recherche ya cu el a haci e denuncia diamars anochi na Warda di Polis na Playa, y nan ta wardando pa polis bin tuma declaracion di su yiu na Hospital.

            E ta considera cu locual ta pasando ta hopi fuerte y e ta pidi colaboracion di instancianan gubernamental, na Ministerio di Educacion, Ministerio di Husticia, SKOA y Maria College pa duna un declaracion tocante ki medidanan nan ta bay tuma cu respecto na e situacion aki, cu ta sosodiendo na Aruba.

            El a wordo informa cu tin hopi denuncia di casonan cu ta archiva, den e instancianan gubernamental, pero nan ta haci caso omiso, siendo cu no por cera wowo, mester lucha y haci frente na e situacion aki.

            Sully a conta cu su yiu ta bibo, pero el a cay dal abao, y si e lo a haya un golpi e lo tabata awo na morgue; e lo no a yega eerste hulp sino na morgue.

            Señora Bedoya a subraya cu e bida di su yiu ta na peligro, y e mes ta teme pa su bida. El a haci un yamada na mayornan, comunidad, maestronan, institucionnan pa nan ta vocero pa stop e bullying.