Bista di DIARIO dirigi riba region den situacion mundial peligroso --- *Placa di Rusia tin un parti grandi di continente Americano bou control --- *Nicolas Maduro ta acorda mayor cooperacion tecnico y cientifico militar
ORANJESTAD(AAN)—Islanan ABC y sigur Aruba, na man di Reino Hulandes, ta atento pa tur desaroyo den region Caribense y Latino Americano cu ta wordo considera e region significante pa sosten na Rusia.
Esaki ta informacionnan concreto cu ta alcansa DIARIO, cu ta sigui tur desaroyo den e region di Caribe, cu ta den e zona mundial cu mas contacto directo cu Rusia.
Manera DIARIO a informa ayera, e Vice Prome Ministro Ruso Yuri Borisov, a haci un bishita oficial na Venezuela caminda el a reuni ayera cu Nicolas Maduro, cu mundo forsosamente mester acepta como e lider di Venezuela aunke pa un cantidad grandi di pais na mundo, ta Juan Guaido ta e Presidente di Venezuela.
Mientras segun informantenan Juan Guaido den un mundo cu ta lucha cu pandemia y awor menasa di un guera mundial ta trata di haya atencion pa peligernan grandi pa stabilidad na Venezuela, Nicolas Maduro ta keda na mando real di e pais y ta forma un peliger creciente pa stabilidad di e region.
Informacionnan cu DIARIO a ricibi ayera ta indica cu Nicolas Maduro a alcansa compromiso importante cu e Vice Prome Ministro di Rusia, Yuri Borisov.
Maduro y Borisov a topa ayera y a atende un nivel nobo di cooperacion entre Venezuela y Rusia na nivel tecnico militar y na nivel cientifico militar.
Publicacionnan mundial cu a wordo comparti ayera cu DIARIO ta indica cu e Prome Ministro di Rusia ta optimista cu e sosten cu Rusia tin di e Venezuela y di palabracionnan cu a wordo haci pa mehora e relacion militar entre e dos paisnan.
Manera ta conoci, basta tempo pasa mundo tabata atende cu e posibilidad cu Venezuela tabata desaroya un base militar Ruso.
Segun informacionnan di fuentenan sumamente digno di credito, Maduro ta amplia su situacion economico cu ayudo di paisnan cu ta sumamente peligroso pa stabilidad politico di e region di Caribe y Latino America.
Durante nan combersacion ayera Venezuela y Rusia a atende un cantidad di asunto y Venezuela a mustra cu e por a supera e crisis cu el a conoce a base di e “politica” cu el a hiba cu relacionnan cu Rusia, cu Venezuela debe sumanan enorme di placa cu Venezuela no por paga sin mas.
E tactica cu Rusia ta aplica na Venezuela ta tactica cu e ta aplica tambe cu cantidad di otro pais.
Informantenan a mustra con Cuba por a mantene un economia cu tabata uno di e economianan mas importante den region di Caribe dor di sosten di cantidad enorme di companianan Mericano situa na Cuba.
Cuba a keda cu tur posesion cu el a nacionalisa ora Fidel Castro a haya poder cu el a entrega na Rusia, cu a cambia Cuba den su centro di operacion.
Nicaragua tambe ta aliado directo di Cuba pa medio di e Gobierno Sandinista cu a bay uni na e grupo Comunista despues cu nan a uza e forsanan di paisnan democratico pa lucha contra dictadura na nan pais.
E Prome Ministro di Rusia lo ta atende cu e plannan Ruso pa aumenta e cooperacion cu paisnan den e region y sigur cu Cuba y Nicaragua tambe mientras mester tene na cuenta cu tur e otro paisnan cu gobiernonan socialista/comunista cu lazo directo cu Rusia, cu a inverti sumanan enorme den gruponan militar cu a percura pa destabilisa America Latino y America Central.
DIARIO por a comprende cu Reino tin atencion pa e situacion actual. Instancianan encarga cu e seguridad nacional di Aruba ta sigui tur desaroyo di acerca na Aruba, caminda Prome Ministro Wever-Croes a tuma e decision pa no habri frontera cu Venezuela, cu awe ta un punto di sosrten pa e cadena comunista na continente Americano, cu cantidad di organisacion regional cu lazo directo cu Rusia, Cuba y e resto di cadena comunista.
