Algun parti di St. Aloysius School no por word renoba mas

ORANJESTAD (AAN): E tin mas di 2 aña caba para, sin cu ni un solo trabao a wordo haci.  Unico cu a haci mientras tanto ta claba plywood riba algun bentana, y esey ta tur cos.

   Awor recien un medio a revela cu tin plan pa djis pone un capa di verf riba e edificio, y pone e alumnonan bek aden.  Esey a provoca un reaccion fuerte di cabezante y demas docentenan riba e asunto aki.  Pasobra e edificio ta den extremadamente mal estado, y algun parti no por ni wordo renoba mas.

   E alumnonan di St. Aloysius School ta ubica keto bay den e parti pabao di e edificio di ex-VAD Printers cu tin pariba di Yrausquin na Playa.

   Manera por a lesa den DIARIO caba, cabezante Vladimir de Cuba a splica cu ningun hende di scol ta na altura di dicho carta. Nan ta lamenta cu via cierto canalnan e noticiero aki ta ricibi e informacion cu ta trece confusion innecesario cerca mayornan. “E noticianan aki ta bruha tera.”

   Nan ta convenci cu bo no por core e riesgo door di duna e lugar un simpel face lift y hinca tur klas bek den e edificio.

    Riba e potretnan aki por mira con e condicion di scol ta actualmente, sin inclui imagen di e parti di plafon paden.  Ademas tin di corda cu e scol no tin airco, y e calor for di Augustus te cu November ta uno insoportable.

   Nan ta suplica Gobierno pa recapacita riba e idea aki, pasobra pa hinca e scol bek den e edificio aki, ta un acto inhumano.  Pasobra hecho ta cu cierto parti di e edificio no por wordo renoba mas.  E scheurnan cu e tin den muraya ta demasiado grandi.

   St. Aloysius School pues lo no acepta pa bay bek den edificio den mal estado.