Mescos cu un tempo “volmacht” e tabata un parti dudoso di proceso electoral - *Informacion personal tabata manera virus den computer den man politico - *AVP tabata kier informacion pa bay busca votadonan cu no presenta na urna
ORANJESTAD(AAN)—Ayera den sala di Corte di Husticia, un cambio importante a wordo haci den e forma cu partidonan politico por atende cu registro di votadornan.
Mescos cu un tempo “volmacht” cu tabata permiti otro hende bay vota cu carchi di votadonan a demostra di ta enemigo di eleccion secreto, ayera den Corte tambe a bini dilanti pakico partido AVP a bay Hues pa evita e cambionan pa cual Gabinete Evelyn Wever-Croes a dicidi y cu cual Prome Ministro Wever-Croes kier a proteha e derecho di votador.
E proposicion di cambio di parti di Gobierno Wever-Croes a haya sosten di mayoria di e participantenan na encuesta despues di debate electoral y cu rason.
Tabata custumber cu e registronan aki ta bira lectura pa partidonan politico y nan lidernan di bario cu tabata uza informacion personal durante y despues di eleccion. Ta conoci cu tin partido cu ta uza e listanan aki manera virus den computer pa sigui pasonan di ciudadanonan hasta despues di eleccion.
Bishita of yamada na cas tabata resultado di informacion personal cu ayera a cambia den sala di Corte, caminda segun veredicto di Huez awor partidonan solamente ta haya nomber y districto electoral di un ciudadano. Nan no ta haya entre otro adres.
AVP tabata kier adres tambe pa asina nan por a bay busca hende cu segun nan ta AVP y cu no a a bay vota y hiba nan urna electoral. Esaki pues tabata un tipo di presion riba un ciudadano cu talbez no kier a bay vota, pero lo por a haya AVP den porta di su cas pa hiba su persona bay vota.
Den su prome declaracionnan ayera Prome Ministro Wever-Croes a bisa cu e ta contento cu loke Huez a dicidi y cu ta evita cu informacion di ciudadanonan ta cay den man di partido politico.
Durante e tratamento di e caso cu DIARIO lo sigui amplia ariba, sigur a bini dilanti cu e cambio actual ta honra bienestar di e votador.
