Reconocemento grandi pa Ray-anne Hernandez pa su forma di eleva cultura

ORANJESTAD (AAN): Diaranson atardi, a organiza un celebracion di Fiesta di San Juan cu su Dera Gai na Departamento di Cultura Aruba (DCA) na edificio di JFK.

   Na e ocasion aki, Departamento di Cultura Aruba a haci entrega di un reconocemento, na persona di un organizacion cu cada aña ta organiza evento di Dera Gai riba Dia di San Juan pa asina promove cultura di e isla.

   E biaha aki, DCA a dicidi na honra e simpatica Ray-anne Hernandez di Comision Promove Cultura di Centro di Bario Tanki Lender na Tanki Leendert.

   Ministro di Cultura Xiomara Maduro a entrega e reconocemento pa tur e esfuerzo grandi cu e ta haci tur biaha pa asina por keda e cultura bibo.  Ray-anne ta un persona hopi envolvi den celebracionnan cultural, e ta un motor pa yuda muchanan sa mas di cultura.

   Ray-anne ta President di Centro di Bario Tanki Lender, y semper e tey cu su team pa  haci esaki posible!  Un dama relativamente hoben el a cuminza caba pa haci e cultura di Aruba mas grandi.  E ta un dama multifacetico y hyper pa logra keda cla cu tur evento.

   Den presencia di Director di DCA y demas personal, a haci entrega di e reconocemento, cu ta chikito pero grandi den e intencion y e amor cu semper e sa duna pa cultura di e isla.

   Na su turno, Ray-anne Hernandez a gradici pa e reconocemento y a gradici tambe na nomber di centenares di voluntario cu el a traha basta aña organizando celebracion di Dia di San Juan y Dera Gai.   Nan ta tiki tristo pasobra ta di dos aña tras di otro cu no por celebra y sigui cu e tradicion, pero  reconocemento ta un empuhe pe y tur voluntario, y tur otro organizacion cu ta organizando e Fiesta tradicional aki.