Alfredo Ruiz a wordo nombra como Chief Technical Officer na WEB Aruba NV

E ta bay yuda na e transicion energetico

ORANJESTAD (AAN): Aruba su compania di awa y energia awor tin un Chief Technical Officer (CTO) dedica.

   Recientemente gerencia y empleadonan di WEB Aruba a yama bonbini na Alfredo Ruiz cu a drenta den servicio como Chief Technical Officer (CTO). E funcion di CTO ta parti di e structura oficial segun WEB Aruba su statutonan.

   E compania mama, Utilities Aruba NV, a tuma un paso importante di nombra un CTO, pa sigui fortalece operacion di WEB Aruba. Alfredo Ruiz lo guia y fortalece e area tecnico den su sentido mas amplio y duna direccion strategico den desaroyo y optimalisacion di nos produccion. Gerencia di WEB Aruba awor ta consisti di CEO Alfredo Koolman y CTO Alfredo Ruiz.

   Alfredo Ruiz ta un ingeniero conoci den mundo di refineria y di utilidad. El a cuminsa como combustion engineer na refineria di Aruba y pa mas cu 25 aña tin un trayectoria impresionante di maneho y ingenieria di diferente tecnica di produccion y distribution di energia fosil y sostenibel, plantanan di desalination di awa, separation y procesamento di sushi (waste management) y gas natural. Ademas e tin amplio experiencia den proyectonan di energia di biento y solo y almacenahe di energia. Alfredo Ruiz su ultimo funcion tabata na Aqualectra na Corsou.

   WEB Aruba ta para na inicio di un Corporate Strategy nobo pa e siguiente afianan. E strategia corporativo entre otro ta enfoca riba un transition di energia fosil pa mas energia sostenibel.  E transicion aki ta birando mas y mas importante, specialmente mirando e situacion geopolitico global actual.  Como parti awor di management team, tanto CEO Koolman y CTO Ruiz lo dirigi y guia WEB Aruba NV pa sigui suministra awa y electricidad sostenibel, confiabel, y pagabel, awo y pa futuro.