*Aprobacion ta duna mayor garantia riba su seguridad
ORANJESTAD (AAN): E bon noticia a drenta dialuna cu FDA a aproba den su totalidad e vacuna anti Covid di Pfizer/BioNTech pa personanan mayor di 16 aña.
Ta spera cu door di e aprobacion di e medida aki e strategia di vacunacion contra Covid-19 lo wordo reforza.
E agencia di remedinan di Merca (FDA) a señala den un comunicado cu a aproba e prome vacuna contra Covid-19.
"Aunke miyones di personanan ya caba a ricibi cu seguridad e vacuna contra Covid-19, nos ta reconoce cu, pa algun, e aprobacion di e vacuna di parti di FDA, por trece confiansa adicional pa haya e vacuna, asina Janet Woodcock, comisario interino di FDA a declara.
E vacuna cu awor lo por wordo comercialisa bao di e marca Comirnaty, ta e prome den haya e aprobacion completo.
E decision di conced'e e aprobacion a basa den datonan actualisa di e ensayo clinico di e remedi, cu ta inclui un mayor duracion di e seguimento, cu un seguridad y eficacia evalua entre mas di 40 mil persona.
Mester enfatisa cu e vacuna ta disponibel bao autorisacion pa uso di emergencia den muchanan entre 12 y 15 aña, pero door cu el a wordo aproba completamente, e mediconan por prescribi e vacuna na muchanan menor di 12 aña si nan ta kere cu esey lo ta beneficioso.
