AFTA ta entrega cifra di e prome mitar di 2026

Minister Geoffrey Wever:

ORANJESTAD (AAN): Recientemente AFTA a entrega su cifranan di e prome mitar di aña na Minister di Finansa, Asunto Economico y Sector Primario, Geoffrey Wever. E entregamento aki ta forma parti di un manera di traha caminda transparencia, responsabilidad y rendicion di cuenta ta central den funcionamento di un instituto profesional.

Pa Minister Wever, e forma structura y consistente cu AFTA ta informa tocante su operacion ta un ehempel importante di bon gobernacion. Institucionnan cu ta traha cu claridad, cu informacion na tempo y cu responsabilidad ta contribui na mas confianza y na un aparato publico mas solido.

“Bon gobernacion no ta solamente un principio riba papel. E mester refleha den e manera cu institucionnan ta administra, reporta y duna cuenta di nan actuacion. Transparencia ta crea confianza y esaki ta fortalece nos institucionnan,” Minister Wever a declara.

Minister Wever ta considera cu profesionalisacion, transparencia y responsabilidad institucional mester sigui forma parti integral di e manera cu institucionnan publico tin cu opera. Esaki ta contribui na un Gobierno mas fuerte, mas confiabel y cu ta administra e interes publico cu responsabilidad y seriedad.