Dairon Ras di FAVI
ORANJESTAD (AAN): FAVI, Fundacion Arubano di esnan Visualmente Incapacita, siman pasa a lansa oficialmente su Accion Anual di Donacion 2026, cu e meta di recauda fondo, entre AWG.60.000 y AWG.70.000,
pa por continua brinda sosten y servicio esencial na muchanan y adultonan cu ta ciego of cu tin limitacion visual na Aruba.
E fundacion ta ofrece, entre otro, guia y rehabilitacion, enseñansa adapta, ayudo tecnico, tecnologia y diferente actividad cu ta contribui na independencia y calidad di bida di su clientenan.
Dairon Ras, cu ta ocupa e funcion di Material Aanpassing Assistent na FAVI y cu ademas ta coordinador di e accion di recauda fondo, a haci un yamada na comunidad Arubano pa sostene e fundacion y contribui na su vision y mision pa personanan cu problema di bista den nos comunidad.
Durante e campaña, ciudadanonan por haci nan contribucion mediante donacion directo, transferencia bancario, standing order, Pay.aw of via e website di FAVI.
FAVI tin dos cuenta bancario disponibel pa donacion: RBC: 31366122, Aruba Bank: 7024380290.
Ras a remarca cu e portanan di FAVI ta habri di dialuna pa diabierna, di 8:00 a.m. pa 5:00 p.m., y ta invita comunidad pa pasa personalmente pa haya mas informacion tocante e trabou di e fundacion of haci un donacion.
Cu cada contribucion, chikito of grandi, comunidad ta yuda FAVI sigui crea oportunidad, promove independencia y brinda e sosten necesario na personanan cu limitacion visual na Aruba. E Accion Anual di Donacion 2026 ta un invitacion pa comunidad uni forsa y haci un diferencia concreto den bida di esnan cu diariamente ta conta cu e servicio di e fundacion.
