Mauro Caralps a splica:
ORANJESTAD (AAN)-- Cuminzando e siman aki, den centro di Oranjestad, a duna inicio na e proceso di demolicion di un edificio, banda di Anna Catharina Building. Asina señor Mauro Caralps, Desaroyador di Proyectonan, cu ta forma parti di Oranjestad Investment Group, a duna di conoce den entrevista cu Matutino DIARIO, y esaki ta pa por sigui cu otro proyecto den Playa.
E construccion di un edificio nobo tin e meta di trece mas negoshi aden den Playa, pa loke ta e ‘ground floor’, y ariba bay den direccion di viviendanan pa trece mas bida den e ciudad di Oranjestad.
E edificio nobo lo bay te cuater piso en total reiterando cu e ground floor ta bira comercial y e tres pisonan ariba ta bira residencial.
E proyecto aki lo tin un duracion di dos aña, pues e intencion ta pa na 2028 e ta full cla. Como parti di Oranjestad Investment Group, el indica cu tin hopi proyecto di e indole aki caba, pero esaki na centro di ciudad ta e prome cu e ta bezig ehecutando cu ne, y e ta spera cu awo cu e ta duna e prome stap, e otronan cu tin mesun plannan tambe por sigui’e. Pero esaki ta prome di varios cu ta bay bin na Oranjestad.
