Aeropuerto di Aruba contento di a yuda tambe pa British Airways lanza vuelo regular pa e isla

ORANEJSTAD (AAN): Diahuebs atardi den VIP Room di Aeropuerto di Aruba, a haci anuncio oficial den presencia di Ministro di Turismo Dangui Oduber,

y personal di Aruba Tourism Authority, cu British Airways lo cuminza bula pa Aruba entrante Maart 2023.

   VIP Room tabata yena cu ehecutivo, stakeholders di turismo, y staf di Aeropuerto cu tabata mustra di ta hopi feliz.

   British Airways lo bula pa Aruba durante henter aña riba Diahuebs y Diadomingo cu un stop na Antigua. E vuelo LGW-AUA lo worde opera cu un Boeing 777-200ER equipa cu 336 asiento, brindando 32 asiento Club, 52 World Traveller Plus asiento y 252 asiento economy.

   Aunke Aruba ta negociando 10 aña caba cu British Airways, desde 2015 a forma un ‘Equipo Aruba’ di Triple A y tambe ATA, pa asina trece mas forza den reunionnan cu British Airways di 2015 en adelante.

   Durante e ultimo 10 luna, e reunionnan y negociacionnan posterior a intensifica y awor a cristalisa cu por anuncia e servicio aki.

    CEO di AAA, Joost Meijs, a comenta cu esaki ta otro logro pa e industria turistico di nos isla cu un servicio permanente entre London Gatwick Airport y Aruba. E introduccion di e servicio directo aki ta un obhetivo cu nos a bin ta traha riba dje y ta encanta cu e esfuerso pa desaroyo di servicio ta duna resultado. Den un sector hopi competitivo, ta esencial pa tin un servicio directo durante henter aña y conexion facil for di mercadonan grandi. Esaki ta un trabao den ekipo y mi ta convenci cu e lo bira un exito!”

   Aruba Airport ta orguyoso di por raporta cu e aña aki, di januari pa juli, a conta un total di  775,926 ‘outbound passenger’, mientras cu e procesa un total di 106,791 pasahero for di Europa.

   Prome cu e anuncio, tanto Ministro Dangui Oduber, Ronella Croes (ATA), y Joosy Meijs (AAA NV) a primi un boton di ‘Start’ riba un tablet cu a pasa un video pa haci e anuncio oficial.  Tabatin brindis despues y chens di felicita otro.