ORANJESTAD (AAN) – Te ainda e santo di Sahara ta afectando e comunidad di Aruba.
Por nota, ora di haci cas limpi, na momento di pasa basora, cu riba vloer tin hopi tera preto cu particulanan blanco cu parce santo fini of cristalnan garna, aunke e caminda dilanti cas ta asfalta y cu den e cura di cas no tin santo blanco ni tera preto.
Tur dia, mester saca cantidad di e tera preto cu particulanan blanco aki for di cas, incluyendo for di cambernan cu ta permanece cera y di baño cu tampoco ta expone na e stof cu biento ta plama.
Ultimamente, den nos comunidad ta wordo papia di casonan di griep persistente, of alergia sin causa aparente, cu ta pone bo consulta cu docter di cas, ken mester receta bo remedi pa alergia.
Organizacion Mundial di Salud (OMS) tin un contesta pa esaki. Expertonan ta bisa cu e efectonan aki pa salud di hende, por ta debi na e contacto di e personanan cu e particulanan biologico presente den e medio ambiente.
E efectonan di e stof di Sahara no ta algo cu mester pasa sin ser nota. Tin hende cu no ta tume cu e seriedad cu mester y ta expone nan mes na biento fuerte cu ta bin carga di stof, y net esey mester evita.
OMS ta recomenda pa evita e exposicion prolonga na stof, incluso den beach, y incluso keda cas ora cu tin presencia di nubianan hopi scur, durante e temporada cu e biento di Sahara cu ta transporta e stof, ta circula na diferente parti di mundo.
Mester tuma diferente precaucion, specialmente e adultonan mayor y muchanan cu tin problema di asma, dermatitis, griep y otro problemanan respiratorio, y sigur esnan vulnerable na Covid-19, ademas di hendenan muher na estado.
Ta recomendable si e persona tin grawatamento di wowo, laba nan bon cu abundante awa herbe cu un drop di clorox. Ta recomendable tambe pa pasa mop pa humedece e vloer prome cu pasa basora, pa evita cu e stof keda suspendi. Cubri tur recipiente cu tin awa pa diferente uso, pa evita contaminacion.
E biento y stof di Sahara ta bishita e region di Caribe den su caminda pa Merca y Europa. E santo ta consisti di particula cu por respira y cu ta midi entre 2.5 y 10 micron. Nan por drenta via e nanishi y boca, y aloha nan mes den e trachea, bronkio, of yega incluso mas chikito te e alveoli pulmonar.
Fuera cu e particulanan di santo di Sahara, e nubia ta lastra otro elementonan presente den e medio ambientenan cu e ta atravesa. Eynan ta ora e bientonan den e desierto di Noord di Africa ta lanta arena, ta recoge elementonan contaminante ora e ta pasa door di zonanan di deforestacion di e region, principalmente di e paisnan sub-sahariano.
Segun algun hende local cu a comenta riba e tema na DIARIO, ora nan ta pasa basora nan ta sinti un holo manera azufro.
