Ecopetrol a descubri gas den un otro poz den Lama Caribe

Compania Colombiano a divulga e siman aki

ORANJESTAD (AAN): E compania di Colombia, Ecopetrol a anuncia e siman aki cu nan a bin descubri presencia di gas den un poz submarino cu ta conoci como ‘Gorgon-2’ den awanan hundo den Lama Caribe.  Esaki ta e parti mas zuidwest di Caribe, unda e profundidad di lama ta di 2.400 meter.  Esaki ta esun di mas grandi realiza na Colombia, y e poz mes ta na un profundidad total di riba 4.000 meter.

   E poz Gorgon-2 ta situa na 178 km zuidwest di Cartagena.

   Segun e compania, e poz aki ta confirma e extension di e descubrimento di gas cu nan a haci na 2017 na e poz Gorgon-1, y ta mustra cu di berdad ta existi un provincia di gas na costa pafo di Colombia.  Den pasado a yega di descubri poznan di gas tambe ora a dal den poz Kronos (2015), y poz Purple Angel (2017), cu awor ta forma parti di ‘Caribe Sur’.

   President di Ecopetrol, Felipe Bayón ta esun cu a anuncia e exploracion y descubrimento di e poz aki den awa hunto.  E resultado aki di e poz Gorgon-2 ta permiti nan avanza den e evaluacion di e descubrimentonan aki den Lama Caribe.  El a bisa cu unavez nan desaroya e poz aki, e lo bay yuda aumenta e reserva di gas na Colombia, y abastece e demanda creciente di e fuente di energia aki cu ta fundamental pa e transicion energetico cu Ecopetrol y Colombia ta planea pa haci.

   Segun e compania petrolero, e provincia aki a bin ta consolida for di 16 aña caba, den cual a nan a haci un analisis detaya y evaluacion di e potencial, y despues a dicdii na bay coba poz, den cooperacion cu companianan mundial cu ta experto den esey.

   Aworaki, Ecopetrol y Shell ta socio den e bloque di Caribe Sur (poznan Col-5, Fuerte Sur, y Purple Angel) cu 50% di participacion cada uno.

   Apenas na luna di Juli cu a pasa, Ecopetrol y Petrobras tambe a confirma descubrimento di un poz di gas natural den e poz exploratorio conoci como Uchuva-1, cu a wordo coba den awanan hunto di Colombia, na 32 km for di costa y 76 km di e ciudad di Santa Marta, cu un profundidad di 830 meter.