ORANJESTAD (AAN): Aruba Airport Authority N.V. (AAA) a marca un logro importante den e proyecto di transformacion di Gateway 2030 cu finalisacion di Fase 1B,
celebrando e finalisacion di e punto structural di mas halto di e proyecto. E ceremonia tradicional di “topping-out”, tambe conoci como “spantenbier”, a tuma luga diahuebs atardi na Aeropuerto Internacional Reina Beatrix na e sitio di construccion di Gateway 2030 Fase 1B, treciendo hunto e trahadonan di construccion, ehecutivonan di gobierno, partnernan di proyecto y stakeholdernan clave.
E logro aki ta representa e finalisacion di e cuadro structural principal di Fase 1B, un paso importante den expansion di capacidad y mehora e experiencia di pasahero en general na Aeropuerto di Aruba.
Fase 1B ta inclui desaroyo di: (*) Tres airbridge (yama ‘slurf’ na Aruba) nobo pa pasahero cu ta permiti e pasahero pa subi mas lihe y di un manera mas eficiente. (*) Tres gate adicional pa bus pa sostene flexibilidad operacional. (*) Sala di espera expandi cu ta ofrece aumento di stoel y mehoramento pa comodidad di e pasahero. (*) Mas opcion di luga di cuminda y pa shop, brindando e biaheronan mas opcion y comodidad.
“E logro aki ta refleha e progreso cu nos ta logrando den e fortalecemento di nos infrastructura na momento cu demanda di biahe pa Aruba ta mantene su mes halto. Fase 1B lo hunga un rol esencial den e mehoracion di fluho, eficiencia y comodidad en general di e pasaheronan, specialmente cu nos ta acercando e temporada halto di winter”, tabata expresion di Jonny Andersen, CEO di Aruba Airport Authority.
E ceremonia a conta cu remarke di e representantenan di Gobierno di Aruba, Aruba Airport Authority y partnernan di e proyecto. Cu hisamento simbolico di bandera a marca e finalisacion di e fase structural, sigui pa un brindis di celebracion reconociendo e dedicacion y colaboracion di tur esnan envolvi.
Aruba Airport Authority ta expresa su gratitud sincero na e trahadonan di construccion, empleadonan, partnernan y comunidad pa nan sosten continuo. Hunto, e esfuersonan aki ta garantisa cu Aeropuerto di Aruba ta keda un porta pa felicidad mientras cu nos ta nabega e fase importante aki di e proyecto di desaroyo Gateway 2030, yamando e biaheronan bonbini cu eficiencia, innovacion y hospitalidad autentico di nos isla.
Potretnan aki pa cortesia di Aruba Airport Authority.
