Segun Randall Van Trigt di Stichting Hunto:
ORANJESTAD (AAN): E proyecto “Bemoeizorg Mobile Outreach Unit” di Stichting Hunto ta dunando su frutanan desde su inicio. Varios cliente ta sali for di caya y ta bay directo Centro Colorado. E Director Financiero di Stichting Hunto, señor Randall Van Trigt, den un entrevista cu DIARIO, a indica cu e meta di e proyecto aki ta pa establece confianza. Esaki, segun e, no ta bin door di papia so, pero door di mustra e ciudadanonan riba caya cu nan no ta nan so, y cu den e caso aki, Stichting Hunto tey pa yuda nan.
El a remarca, cu door di brinda e ciudadanonan aki un luga unda cu nan por baña, refresca nan mes, y come, ta genera confianza. Y esaki ta loke cu e “Bemoeizorg Mobile Outreach Unit” ta logrando den barionan.
Despues cu establece e confianza aki, Stichting Hunto ta combersa cu e ciudadanonan aki y ta splica nan e proceso di rehabilitacion na unda cu nan ta visualisa unda nan ta wak nan mes aki un aña, cu auto, vivienda etc. pa asina nan por resocialisa den comunidad.
Banda di esaki, señor Van Trigt a remarca cu un otro meta ta pa kita e molester visual cu por wak den centro di ciudad. Ciudadanonan aki ta cana lomba sunu y sushi of cu paña kibra riba caya. Cu e proyecto aki kier logra pa elimina esaki y pa e ciudadanonan aki cana baña, pela y limpi.
Señor Van Trigt a enfatisa cu pa logra e meta di e proyecto aki, mester tin un cooperacion di un ekipo completo pa traha hunto, entre otro Stichting HUNTO, Gobierno, KPA, Departamento di Asuntonan Social, Respaldo, Ministerio publico y otro instancianan concerni.
Segun señor Van Trigt, leynan ta existi, entre otro di curatela, pero no tin localidad pa hacie bon. Segun e, no por cera e ciudadanonan aki den KIA, pasobra adictonan cu ta bou curatela ta ful otro cu criminalnan cu ta cera den KIA. El a remarca, cu hunto cu Gobierno mester yega na un metodo cu ta corecto.
“Ta hopi importante pa nos comprende, solucion pa adiccion, no ta pa cera hende. Mientras cu ta berdad cu tin un grupito cu no lo recupera y ta sigui comete crimen cu mester bay cera, mester structura pa na un manera holistico duna guia y yudansa na e grupo mas grandi kier recupera”, señor Van Trigt a bisa.
El a agrega cu pa 40 aña largo no a haci nada pa adiccion. No a crea un sistema pa recupara hende di berdad. Leynan a wordo traha, pero nan tabata bashi. Segun e, no tawatin control ni maneho.
“Awo Stichting Hunto ta purbando pa crea e sistema, pero leynan ta anticua y no tin localidad. P’esey nos ta na mesa cu Gobierno y KPA pa mustra nan cu a bira tempo pa pone accion tras di tur loke ta skirbi riba papel”, señor Van Trigt a enfatisa.
