ORANJESTAD (AAN): Den continuacion di e programa nacional di reforestacion, Prome Minister Mike Eman a bishita personalmente e area na Henny Eman Boulevard,
unda actualmente ta realisa trabaonan di preparacion pa plantacion di mata.
Durante e bishita, Prome Minister a extende un invitacion na comunidad pa participa den e ceremonia di plantacion, cu lo tuma luga dialuna 27 di april (Dia di Rey) pa 4’or di atardi, den e area dilanti Aeropuerto di Aruba.
Segun Prome Minister, e iniciativa ta forma parti di un esfuerso consistente pa haci Aruba mas berde, cu un maneho strategico pa selecciona ubicacionnan caminda reforestacion no solamente lo fortalece naturalesa, pero tambe contribui na embeyecimento y balor di e entorno.
E proyecto na e interseccion di Adriaan Lacle Boulevard cu Henny Eman Boulevard ta un ehempel concreto di e enfoke aki, combinando desaroyo urbano cu restauracion di vegetacion nativo.
Prome Minister a expresa su aprecio pa Aruba Airport Authority (AAA NV) pa su cooperacion den e proyecto, resaltando importancia di colaboracion entre sector publico y priva pa logra impacto duradero.
Den e mesun contexto, el a subraya e trabao continuo di Aruba Conservation Foundation, cu a desaroya un nursery enfoca riba cultivo di matanan endemico. E iniciativa aki lo provee e base pa sostenibilidad di e programa di reforestacion, cu meta pa planta miles di matanan nativo riba e isla.
Prome Minister a indica cu e vision ta ambicioso, cu un obhetivo pa yega na cifra di 100 mil mata, semper manteniendo enfoke riba especie nativo pa proteha y fortalece ecosistema local.
E invitacion ta habri na henter comunidad pa participa activamente den e proceso di reforestacion, marcando un paso concreto pa un Aruba mas berde, sostenibel y conecta cu su naturalesa.
