Aerolinea nobo awor ta conecta Aruba directamente cu Santo Domingo

Boeing 737 Max-800 a ateriza

ORANJESTAD (AAN): Arajet, un aerolinea Dominicano nobo di tarifa cu costo abao, recientemente a confirma cu tur arubiano lo por cuminsa bula directo desde Aruba pa Santo Domingo. 

   Cu e gran compromiso aki, Arajet, ta busca pa conecta Aruba cu Santo Domingo y Diabierna atardi e prome vuelo a ateriza na Aruba.  Arajet tin cinco avion Boeing 737 Max-800 cu a caba di sali for di fabrica, y tin mas na caminda.  Di e forma aki, nan kier ofrece pasaheronan cu diferente experiencianan turistico y comercial, pero tambe pa duna un impulso na e crecimento y desaroyo economico di ambos pais a traves di e promocion comercial y turistico di e dos paisnan tan importante den Caribe, cu tin un historia comun. 

   E fundado y CEO di Arajet, Victor Pacheco, a garantisa cu “Sin duda, pa Arajet, Aruba ta un destinacion cu hopi interes, debi na e demanda di e biaheronan cu ta bay y bin pa Republica Dominicana. Nan kier ofrece e habitantenan di Aruba un alternativa di biahe cu ta accesibel den prijs y cu ta cumpli cu nan expectativa di biahe di menos costo, cu servicio di clase mundial y cu e avionnan di mas nobo y eficiente riba mercado.”

   Un brindis special a ser teni na Aeropuerto di Aruba, cu e.o. Ministro di Turismo Dangui Oduber, director di Aeropuerto Joost Meijs, directora di Aruba Tourism Authority Ronella Croes, y demas ehecutivonan di Aeropuerto.