Den combersacion cu habitantenan:
ORANJESTAD (AAN) – Parlamentario Alvin Molina, di fraccion di MEP, a combersa cu habitantenan di San Nicolas y a inventariza nan preocupacionnan, pa loke ta concerni trafico insigur den nan Distrito. Asina el a bisa den conferencia di prensa, teni na Carnival Village, Diahuebs di e siman aki.
Molina a comparti su preocupacion mes tocante e cruzada peligroso di Lagoweg-Bernhardstraat, y a papia extensamente di esaki y e mocion cu el a presenta den Parlamento na October 2021 y con e ta buscando un solucion.
Pero no ta solamente e cruzada aki, el a bisa. E por a compronde di habitantenan mes cu na San Nicolas, tin varios caminda cu por, y ta, forma un peligro den trafico pa cura di cas, autonan cu ta staciona y cu habitantenan tin miedo di sali di nan cura, muchanan cu no por hunga riba caya, mientras ta obvio cu ta trata aki, di areanan habita.
Parlamentario Molina a entrega un mocion tambe pa e situacionnan aki, pa evalua si slipping police ta un manera pa haci e trafico mas sigur, y con por logra pa nan por wordo instala.
Molina a menciona cu den un combersacion cu e director di DOW, Ing. Marlon Croes, el a splike riba un aspecto hopi importante: e no ta solamente responsabilidad di DOW pa tene e trafico di Aruba sigur.
E no ta posible pa yena tur caretera na Aruba cu slipping police. E parti di seguridad den trafico por wordo parti den tres punto: construi rotonde of slipping police, control di Cuerpo Policial, pa comportacion indesea riba caminda publico y e parti di educacion.
“Pasobra na final di dia nos mes ta responsable pa e manera cu nos ta comporta nos mes den trafico. Sigur gobierno y stakeholders por hunga un rol pa yuda educa y concientiza pueblo riba ki peligro nos por causa si nos no ta comporta bon den trafico”, Parlamentario Molina a subraya.
El a conclui bisando cu esakinan ta tres punto cu e lo keda follow up riba nan.
