ORANJESTAD (AAN): Evelyn Yarzagaray-Ras, Directora di Fundacion Famia Planea a duna di conoce cu tur aña for di aña 2007 caba,
United Nations y World Health Organization ta proclama cu esaki ta e luna cu nan ta para keto na e parti di salud sexual reproductivo.
Fundacion Famia Planea a uni na e celebracion y concientisacion encuanto e trabaonan cu nan ta haci desde aña 2007, a bisa.
E directora di FPA a sigui bisa cu nan a inicia cu e movimento aki y ta enfoca riba productonan, pero tambe riba e salud sexual mes manera higiena, pubertad y conexion cu e cliente pa mehora e guia cu nan ta ricibi di e fundacion, pero tambe pa nan por duna 'feedback' riba e productonan cu nan ta uza y e servicionan cu nan ta ricibiendo.
Pa loke ta e plan di FPA pa 2023, Yarzagaray-Ras a indica cu desde aña 1970 nan ta traha completamente riba e area preventivo, cu e anticonceptivonan cu nan ta suministra no solamente pa evita un embaraso no desea, pero tambe pa e malesanan contagioso, cu tambe ta lantando cabes.
Den transcurso di aña a bay enfoca hopi riba educacion pa asina por bay mas den contenido di e salud sexual, pero tambe emocional.
Esaki a bin ta funciona hopi bon, a enfatisa. FPA ta ricibiendo hopi hoben di scolnan, pero tambe adultonan cu ta keda cliente cerca nan pa ricibi e guia.
Durante e pandemia a enfoca riba servicionan digital y a wak cu e servicionan aki ta necesario. Locual FPA ta wak como NGO y ta bezig cu un 'business approach' caba como plan strategico unda cu e cliente ya den 2022-2023 no por keda warda "pa nan yega cerca bo. Bo tin cu bay cerca nan", a expresa.
Pesey tambe FPA tin e 'web-store' unda cu por 'shop online' y te hasta por pidi entrega na cas. Banda di esaki tin e parti di educacion integral cu nan ta duna ora di bay na scolnan, pero tambe haci consulta na scolnan si mester, a splica.
Unda cu por yega a un 'joint venture' cu cualkier otro stakeholder ta purba haci esey pa mehora e servicio cu FPA ta duna y pa por enfoca mas riba prevencion, Evelyn Yarzagaray-Ras a duna di conoce.
