Accion di limpiesa di tur warda di polis a finalisa cu resultado di 300 auto destrui

Minister Tjon a revela:

ORANJESTAD (AAN): Minister di Husticia Rocco Tjon a duna di conoce cu dos siman pasa a termina cu e accion grandi cu tabata tin di parti di Cuerpo Policial caminda tur e wardanan di polis a wordo haci completamente limpi.

E mandatario a remarca cu esaki ta eleva e seguridad na e wardanan di polis pa e agentenan policial pasobra tin menos material cu hendenan lo yega na e wardanan aki.

Den cuadro di esaki, hunto cu alto mando policial, e siman aki ta bay firma un decreto pa adkiri camaranan pa tur e wardanan di polis, cual ta inclui un sistema di monitor tambe pa seguridad di e agentenan policial, Minister Tjon a revela.

E accion cu a termina dos siman pasa a laga como resultado 300 auto destrui. Esaki a sosode despues cu a brinda oportunidad na tur ciudadano pa yega na e wardanan di polis y prueba si un di e autonan ey tabata di nan y cu tabata tin derecho di haya e auto bek.

E minister a laga sa cu cualkier persona cu ta di opinion c'un auto di dje a wordo destrui inhustamente semper por acudi pa entrega keho cual lo wordo analisa.