ORANJESTAD (AAN) – Algun siman pasa caba a sali publica e informe, cu prijsnan di Airco desde fin di December 2021 a subi barbaramente.
Esaki a socede debi cu e prijs pa transporte di container for di Asia a subi for di como $3.000 te na riba $16.000. Pero ta parce cu el a subi caba pasando na $21.000 pa cada container.
Pesey mes, un airco cu na 2020 a wordo cumpra na un prijs atractivo, durante 2021 a subi cu casi 900 Florin, siendo cu e ta mesun modelo y marca y capacidad di BTU.
Aworaki na Mei 2022, diferente compania cu ta bende aparatonan electro-domestico, tin ofertanan riba prijs di airco, segun informacion duna for di un compania mes.
E motibo di esaki ta cu for di entrante Juni, e prijs di airco lo bira excesivamente costoso. Esaki lo nifica cu un airco, posiblemente, lo bira aun mas costoso, entre 1.600 pa 2.000 Florin segun e grandura di esaki, y si pensa riba cumpre riba credito e lo bira un necesidad impagable.
Tin indicacion cu e companianan ta purbando pa bende locual nan tin den stock na menos prijs pa yuda e clientenan pero tambe pasobra nan ta premira cu e benta di aire acondicionado lo por baha drasticamente, mientras cu nan lo mester paga hopi mas pa e producto den e siguiente importacionnan.
Lo ta bon pa pueblo tuma nota di esaki, pasobra posiblemente no ta solamente prijs di airconan lo subi sino di tur otro artefacto electrodomestico, y Dios so sa kico articulonan mas lo bira impagable, mientras cu den e pueblo e situacion ta sigui dificil y preta pa cantidad di famia.
Ya caba por a mira e prijs di comestible con den e ultimo siman a bay “sky high” y definitivamente no tin control riba prijs, pasobra incluso productonan manera aroz y azeta dushi ta bira hopi mas caro, siendo cu nan ta parti di e macuto basico.
