Consul Dominicano a cuminza cu un proyecto pa uni tur e consulnan na Aruba

Marllory Medina, Fundacion Venezolanonan Uni na Aruba:

ORANJESTAD (AAN) – Fundacion Venezolanonan Uni  na Aruba, a yama un conferencia di prensa, cual a ser conduci pa su presidente señora Marllory Medina. El a elabora riba dos aspecto: e meta di e conferencia di prensa riba su mes, y a papia tambe riba e proyecto “comedor popular” cu ta andando caba.

Consulnan uni na Aruba:

Medina a menciona cu esaki ta un conferencia internacional informativo, den cual tabata presente e Consul di Republica Dominicana, e persona encarga cu “Fundacion Peruanos en Aruba”, y diferente fundacion.

E meta di e conferencia di prensa aki ta pa duna informacion tocante e funcion di cada institucion na Aruba, na nivel nacional y internacional, ya cu hopi ciudadano ta acerca su Fundacion buscando informacion.

 Marllory Medina a splica cu, por ehemplo, e Consul di Republica Dominicana a cuminza cu un proyecto di union entre tur e consulnan, na nivel internacional, na Aruba. E conferencia di prensa aki a wordo transmiti en bibo atravez di e plataforma di facebook di Fundacion Venezolanonan Uni na Aruba. E dama a reitera cu e meta di e conferencia di prensa aki, ta pa duna informacion pa hendenan na Aruba of pafo di Aruba, via e redanan social.

Comedor popular:

Manera ta conoci Fundacion Venezolanonan Uni di Aruba, aña pasa nan a instala e comedor popular cu ta wordo organiza den un localidad facilita pa nan, na Palm Beach Plaza. Medina a splica cu nan ta dunando cuminza na 150 mucha tanto Arubiano como di diferente otro nacionalidad. Nan intencion ta asisti mas tanto na hendenan cu mester di cuminda, y nan ta entregando cuminda cayente tur Diadomingo, pa 11 or di mainta. Y pakinan di cuminda ta wordo duna cada pasa un siman.

El a menciona cu nan ta haya ayudo di e Gerencia di Palm Beach Plaza, y tin diferente hende cu ta yudando cu paña, un poco cuminda, cu e fundacion por reparti cu diferente persona den necesidad.

E fundacion tin un grupo di boluntario cu ta duna un man, pa cumpli cu nan filosofia “caba cu desnutricion aki na Aruba” debi cu Covid-19 a bin cu diferente consecuencia: hendenan cu a perde trabao, hende cu mester scoge entre paga scolgeld pa nan yiu (SKOA), of paga awa y coriente, hipoteca of huur di cas, y hopi biaha nan no tin placa pa paga nada di esey.

E momentonan ey e fundacion a haci un estudio di factibilidad cu diferente hende, y a yega na e conclusion cu mester actua mesora, pa evita desnutricion. Marllory a comenta cu e conoce bastante desnutricion na Venezuela, y e no kier pa mescos sosode na Aruba, y cu por tin mucha cu ta muri pa falta di cuminda.