Accion di AVP pa lanta sushi den Dakota a laga e bario limpi

ORANJESTAD (AAN): E fin di siman aki Partido AVP a tene su prome accion di Common Good in the Neighborhood caminda e bario beneficia tabata Dakota.

Un grupo di entre 50 pa 60 boluntario consistiendo di liderato, candidato, miembro y activista di e partido a recore cayanan di Dakota pa recoge e sushi acumula cu tabata afecta e bario.

    Segun AVP, e proyecto a consisti di dos fase. E prome den cual a pasa bishita e habitante durante diferente atardi lagando atras saco di sushi y informacion pa laga haci uzo di e saco y laga e sushi pafo riba e fecha cu lo pasa recog’e.

E di dos parti ta esun cu a sosode diasabra 2 y diadomingo 3 di september, caminda rond di 20 pickup a pasa piki nan pa hiba y tira den bakinan di sushi cu compania a pone disponibel como sosten pa e accion comunitario.

   Na opinion di AVP, gobierno a cera dump; dump tabata semper un problema, pero djis cera dump y no percura pa un alternativa cu ta pagabel, ta conduci cu ta acumula sushi den cura di cas pasobra nan no tin e fondo pa paga. Por ta pa comercio si, pero pa un famia no.  Basa riba loke AVP a mira den e weekend aki, por bisa cu tin un crisis nacional acumulacion di sushi den bariuonan pa motibo cu dump ta sera y no tin un alternativa pagabel pa pueblo.

   Loke AVP ta contento cu ne ta cu desde cu a anuncia e programa aki, Minister Ursell Arends a lanta fo’i soño y ripara cu el a haci un desaster pa higiena y medio ambiente. Cu awo gobierno ta core pone baki disponibel den bario ora a mira e anuncio di AVP, ta aplaudi. Ta spera cu nan lo ta consistente si.

   Na opinion di AVP, esey ta loke Gobierno a haci:  A cera dump di Parkietenbos y a habri e “dump Aruba”.

    Wendrick Cecilia y Clifford Heyliger tambe a forma parti di e accion di e fin di siman y a describi esaki como uno cu ta brinda speranza y inspira nos comunidad riba e echo cu tin un ruta alternativo y cu tin un vision pa gobernacion den partido AVP cu e bon comun.  Otro miembronan di partido cu por a mira activo den e accion aki di Bon Comun den bario tabata Benny Sevinger, Conny Conner y Junior Croes.