Shurman Milliard, director FTPH:
ORANJESTAD (AAN) – Shurman Milliard, director di Fundacion Telefon pa Hubentud (FTPH), den un entrevista a menciona cu FTPH semper tin proyectonan nobo, y nan ta bezig tambe cu proyectonan di pasado, pa yega na su gruponan meta, cu por ta hoben, adulto, comunidad, of otro, y pesey e fundacion tin hopi bon cooperacion cu otro fundacionnan.
Na e momentonan aki FTPH ta hopi den media cu e proyecto “I Stopped it” cu ta un proyecto cu a traha den cooperacion cu HIAS, y cu ta pa combati violencia den tur su diferente formanan, por ta violencia di genero, domestico, o den comunidad.
“Esaki ta un proyecto cu nos a traha hopi duro riba dje, danki na e confianza di HIAS den Telefon pa Hubentud, pasobra HIAS a acerca nos pa conhuntamente traha riba e proyecto aki. Nos ta hopi contento cu e samenwerkingnan, no solamente cu HIAS pero tambe cu otro fundacionnan nacional y internacional”, Shurman a señala.
Na e momentonan aki FTPH ta haya hopi peticion internacionalmente, y nan ta hopi contento cu esaki. “Nos ta haya hopi peticion tocante termento, cu ta un di e temanan cu nos ta haya hopi conocemento di dje, y banda di dje ‘Best Dad Ever’ cu tambe ta bay internacionalmente na tur caminda, y nos ta wak cu ‘I Stopped it’ tambe ta un proyecto cu hopi informacion valido y importante, cu no solamente ta trata di violencia di hende cu ta dal otro, cu nos ta habri corant y nos ta wak problema di pareha, bringamento, violencia di homber pa hende muher, violencia entre hendenan jong pa hendenan grandi, cu tambe ta un problema cu hopi biaha ta keda scondi, adulto cu ta dal un hende di edad halto, tambe ta casonan di violencia cu ta sosode hopi”, Shurman Milliard a menciona.
Y naturalmente, como Telefon pa Hubentud nan ta papia tocante violencia contra mucha, abuso di mucha, cu ta bin bek den “I Stopped it”. “E proyecto aki nos a cuminza cune, desaroy’e y nos mes a crea esaki. Esaki ta sali di e centrum di Telefon pa Hubentud mes, unda FTPH ta wordo acerca door di diferente partido sea internacional of nacional, departamentonan, y diferente fundacion.
“Nos ta bay traha for di nos propio conocemento, door di e cifranan di Aruba, nos ta busca door di contactonan internacional cu kico tin den nos mesun area, anto despues nos ta traha un proyecto pa nos mesun comunidad, cu ta bay reach e grupo cu nos kier reach. Nos ta hopi contento cu nos tin e confianza di e diferente fundacionnan p’asina nos por keda desaroya e centrum di Telefon pa Hubentud, cu ta hopi amplio caba, pero cada luna, cada aña ta bira hopi mas grandi y mi ta contento pa bisa cu den e aña aki y otro aña nos tin dos proyecto caba, nacional y internacional tambe cla pa asina nos por yuda nos comunidad”, Shurman Milliard a duna di conoce.
