Abo sa grita bo yiu? Ki efecto esaki tin riba dje?

            Tur mucha sa haci cosnan cu ta irita su mayor. No scucha, duna contesta “fresco”, ignora y mustra mal actitud…ta cosnan cu tur mucha lo haci tin biaha.

Algun ta haci’e masha poco mientras otronan ta hacie diariamente. Mescos cu mayornan, mucha tambe tin nan dia bon y nan dia malo. Por yama esaki comportacion comun di mucha pasobra tur mucha na mundo sa mustra comportacion indesea na un momento of otro. Pero tambe tin comportacion mas serio cu no por clasifica como comun. Nan ta comportacionnan negativo cu un mucha ta siña durante su crecemento. Por ehempel: gaña, basha’bou, tenta, yama nomber, dal etc.

            E comportacionnan aki por ta hopi frustrante pa trata y por haci cu hopi mayor ta uza gritamento como forma di disciplina. Por ehempel: e mucha ta dal su ruman y e mayor ta grita: “Stop di dal bo ruman!” of e mucha ta duna un contesta fresco y e mayor ta grita: “No contesta mi asina!”, pensando cu e gritamento lo caba cu comportacion indesea. Den algun caso, un grito por stop e mucha di haci loke e ta haciendo pero gritamento continuo ta siña mucha ignora e mayor. Gritamento no ta un forma di disciplina sino un estilo di comunica. Disciplina no ta encera gritamento, sino un guia calmo, dirigi na siña e mucha pakico su comportacion no ta aceptabel. 

Ki efecto gritamento tin riba mucha?

            Gritamento ta haci mucha bira nervioso, sinti berguensa y menosprecia. Grita bo yiu por spant’e y causa daño riba termino largo, manera baha su auto estima, crea falta di control propio, haci’e bira impulsivo, lihe pa rabia, perde pasenshi facil y desaroya un temperamento “explosivo”. Ademas, mayornan cu ta grita, ta siña nan yiu pa grita bek y haci mescos ora nan bira mayor. E mucha no ta siña bon comportacion pa motibo cu e ta haya un grito na luga di haya un splicacion dicon su comportacion mester cambia. Ora bo grita bo yiu, bo ta siñando e cu gritamento ta un manera pa resolve problema. Mayoria mayor cu ta grita nan yiu, tambe a haya e mes trato tempo cu nan tabata mucha. Kiermen, gritamento ta un habito negativo cu mester stop cu ne. 

Prome cu por stop cu gritamento:

            Reconoce cu frustracion ta parti di bida. Tin hopi motibo pa perde pasenshi y bo no ta un mal hende si bo sa grita bo yiu. Ta djis cu gritamento ta causa mas daño cu e ta haci bon.

Purba ripara loke ta haci bo “fuse bula”. Cansansio? Tristesa? Preocupacion? Unabes cu bo sa, bo por ta mas alerto y busca otro manera pa reacciona.

Papia cu un amigo: baha frustracion riba mucha no ta husto. Desahoga cu un adulto of bay keiro un rato pa “saca steam” y relaha. 

Uza rabia pa motibonan apropia: uza bo grito pa situacionnan di peliger. Si bo uza rabia pa forsa mucha pa haci loke abo kier, nan ta bay imita bo.

Duna direccion: na luga di grita cu bo no gusta loke e ta haciendo, laga e mucha sa kico bo kier y loke ta aceptabel.

Duna hopi cariño: Mucha gusta agrada nan mayor. Bisa bo yiu cu bo stim’e y bo lo ripara cu e lo duna bo menos motibo pa grit’e. 

Kico por haci na luga di grita bo yiu?

            Tur mayor conoce e momento cu na “fuse bula”. Maske tin biaha e por parce inevitabel, gritamento ta crea mas problema cu e ta resolve. Aki ta sigui algun paso cu ta mas productivo cu grita bo yiu ora e comporta malo:

Scucha: puntra bo yiu pakico e ta haci e cos cu ta irita bo. Keda puntra te ora e mucha bisa dicon e ta comporta asina. Hopi biaha bo ta yega na e raiz di e problema. Scucha ta kita e atencion di e mal comportacion y fih’e riba e motibo pa e comportacion. Por ehempel: bo yiunan ta pleita y un ta dal e otro. Ora bo puntra e pakico ela haci esey, e ta bisa cu su ruman no kier dune e “remote control”. Kita e remote fe nan, paga e television y pidi nan pa yega na un  acuerdo cua programa ta bay wak. Ora bo sa pakico nan ta pleita, bo por yuda nan resolve e problema cu palabra y evita dalmento y gritamento den futuro.

Splica: mucha no sa con e mundo ta funciona of con hende grandi ta pensa. Splica bo yiu e dicon di cosnan na luga di djis bis’e. Splicacion ta duna bo yiu informacion cu e por uza ora otro situacionnan presenta. Splicacion ta evita hopi problema y malcomprondemento.

Disciplina: Si bo ta uza gritamento como un forma di disciplina, bo yiu pronto lo cuminsa ignora bo gritamento y sigui cu su mal comportacion. Miho uza otro formanan di disciplina manera “time out/in” (pone bo yiu tuma un break, y papia cune tocante su comportacion), kita un co’i hunga of privilegio preferi (paga e television, tablet, of co’i hunga) of dun’e un tarea cu ta distrae, dune un consequencia cu ta lag’e carga e responsabilidad di su accion. Por ehempel: Si e la pinta riba e muraya, no grit’e cu e no mag pinta riba muraya. Splic’e e regla, cu si kier pinta, ta pinta riba papel y lag’e yudabo haci e muraya limpi.

Aparta: si e problema ta asina grandi cu bo ta sinti pa grita, miho aparta bo mes for di bo yiu un rato. Bisa bo yiu pa duna bo un momento pa calma y pensa con bo ta bay reacciona riba su comportacion. Pidi’e bay den su camber un rato y pensa tocante su comportacion. Ora bo calma, yama bo yiu y scucha-splica-disciplina. 

            Gritamento por parce e solucion mas facil y lihe pero e pasonan menciona ta yuda establece un relacion mas calmo y productivo cu bo yiu, cu lo yuda boso compronde otro miho y preveni frustracion innecesario den futuro. 

Fuente: Website Parenting: “Stop yelling at kids” y www.livestrong.com “Effects of yelling at kids”.

Pa informacion of pregunta por acerca Fundacion Pa Nos Muchanan - Cumana 2